Education Minister-in zirlaite lehkhabu chhiar tam turin a fuih

School Education Minister Dr. Vanlalthlana chuan zirlaite chu lehkhabu chhiar tam turin a fuih.

Nimin khan Champhai-a Education Training Hall-ah ‘Meet Your Minister’ hun hman a ni a, he hunah hian Education Minister Dr. Vanlalthlana chuan zirlaite chu eng lehkhabu pawh an chhiar chuan thiamna leh finna an chhar chhuak zel tih hrilhin, lehkhabu chhiar tam turin a fuih a, Scientist ropui Thomas Alva Edison pawhin vawi tam tak a hlawhchham hnuah thil ropui tak tak a siamchhuak tih sawiin, thil siam thiam James Dyson pawh vawi tam tak hlawhchham hnuah mi hausa tak a nih tawh thu te, Actor Sylvestor Stallone pawh harsatna tam tak paltlang hnuah khawvel mi lar a ni tawh thu te sawiin, heng mi ropui tak tak te ang hian engpawh tawn tlangin mi ropui an ni ve thei tih a sawi a. Chutiang thleng tur chuan taimakna leh tumruhna nen mahni kalna lam zir leh thiam tum a tul a, intihhlimna khawvelah rilru fim leh ngaihtuahna tha neih a tul thu a sawi a, Social Media pawh mahni hmasawn nana hmang hram turin a chah a ni.

He hunah hian Minister hian naupangte zawhna chhangin fuihna thu a sawi chhunzawm a, sawrkar Policy chungchang te, Education Department thil tum hrang hrang te a sawi bawk.

Education Minister hian nimin vek khan Govt. Champhai College tlawhin zirtirtute nen an inkawm a, College leh DC Office tangkawpin Civil Services Coaching Class an lo buatsaih chu lawmawm a tih thu sawiin, zirlaite'n an hlawkpui ngei a rin thu a sawi a. Duhthusamin Zirtirtu leh Staff an nei lo tih a hriat thu sawiin, a theih ang angin tanpuina pek a tum thu a sawi a, chutihrual chuan theihtawp chhuaha zirlaite hamthatna ngaihtuahin taima taka zirtir zel turin a chah bawk.