Indo-Myanmar border fencing dodal turin ZORO in sawrkar leh NGO te an sawm nawn leh

Zo Re-Unification Organisation (ZORO) chuan Indo-Myanmar border fencing dodal turin nasa taka kan tanrual a ngai tih sawiin, “Sawrkar leh NGO a kan thawhpuite dodal tur hian ZORO chuan thinlung takin a sawm nawn leh a ni,” an ti.

Nimin-a Aizawl Press Club-a thuthar thehdarhtute an kawmna ah ZORO hruaitute chuan sawrkar laipui-a Ministry of Home Affairs in Indo-Myanmar inrinaah ‘Daidanna bang’ (Border Fencing) siam tuma hma a la mek chu unau, thlahtu thuhmun, thisen inzawm Zofate India Sawrkarin min thendarh a tumna ah an ngai tih sawiin, tha lo an tih thu leh an duh lo takzet tih sawiin, “Daidanna bang (border fencing) siam hi a hlawhtlin loh nan nasa takin kan dodal zel dawn tih kan puang nawn leh a ni,” an ti a. Indo-Myanmar border fencing hi ngun takin an zirchian thu sawiin, “Zofate tan a that lohzia thahnem tak kan hmu a, Zofaten kan tawrhna tur hi nasa takin a pung dawn a ni,” an ti a. “Myanmar a awm leh India rama awm Zofate hi unau, thisen a inzawm kan nih avangin chhiatni/thatniah kan intlawhpawh a, nupui/pasal kan in neih pawlh a daidanna bang siam a nih chuan kan inunauna a bo telh telh anga, nupa inthen thahnem tak an awm anga, unau thlahkhat kan nihna a bo tial tial dawn a, chu chu kan hnam tan a tha lova, a hlauhawm a, keini aia hnam lian zawk ten min chimral ve ve na tur hmanruaah kan ngai a ni,” an ti.

Indo-Myanmar border fencing hian Zofate kan unauna a tihchhiat piah lamah kan ram tan nghawng tha lo tak tak a nei dawn nia sawi bawkin ZORO chuan, “Mizoram leilung thahnem tak kan chan dawn a, ramri atangin metre 150 aia hnai lova a hungna siam tur a ni a, ramri hrul a cheng thahnem tak ei leh bar zawnna a tlachhe nghal dawn a, kan leilet te, Sangha manna te, kan Balu lakna zawng zawng kan chan vek dawn a, hei hian chhungkaw thahnem tak mangangin a siam dawn a ni. Hei hi a chianna chu Indo-Bangladesh border fencing hian Mizoram pawnah khaw 12 zet a hung chhuak a, khawlai tan tlang khaw 3 a awm bawk a, hmun thenkhatah phei chuan KM 1 dawn a hlaah te fencing hi siam a ni,” an ti a. Indo-Myanmar border fencing hian Ramsa inthlahpunna nasa takin a khawih pawi theih dawn thu pawh an sawi a ni.

ZORO chuan sawrkar laipui in ramri hung a tum hi Arunachal Pradesh State-ah chuan dodalna a nasat avangin kalpui mumal theih a nih loh thu leh Nagaland State-ah pawh Sawrkar leh NGO ten an dodal nasat avangin an kalpui thei rih lo nia sawiin, Manipur State hmun thenkhat ah kalpui tan mek a ni a, hmun thenkhat ah chuan dodalna a nasat avangin kalpui theih a ni lo niin an sawi bawk a. Mizoram State-ah pawh hma an rawn lak tirh khan Sawrkar leh NGO hrang hrangin dodalin, India sawrkar pawh a tim deuh nia an hriat thu an sawi a, “Mahse hun an kal deuh a dodalna a nep tak deuh avangin kalpui tan a ni a. Mizoram ramri dep District thenkhatah phei chuan survey pawh neih zawh tawh a ni. Indo-Myanmar border fencing hi Zofaten lungrual taka kan dodal tlan a ngai a, border fencing dodal tur hian nasa taka kan tanrual a ngai a, Sawrkar leh NGO a kan thawhpuite dodal tur hian ZORO chuan thinlung takin a sawm nawn leh a ni,” an ti bawk.