Diesel khawl-a Tui pump theih zat tihpun a ni

Serchhip khawpui-a tui harsatna thleng mek ah Diesel Engine hmanga tui pump theih hun chu tihpun a ni a, Tuisem a ziaawm leh vat theihnan theihtawp an chhuah mek zel thu PHE Department hotute chuan an sawi.
PHE Serchhip WATSAN Division-a Sr. Executive Engineer, Isaac Lalchhuan-mawia chuan Serchhip khawpui chhunga Tui harsatna thleng mek chungchang hi sawifiahin, November 9, 2025 atang khan Serchhip Tui chawmna atana Tui Pump khawl pui ber, Clearwater Electric Pump khawl tihnun leh run-na atana Electric part pawimawh tak mai ‘Soft Starter’ chu a chhiat avangin tun thlengin Electric khawl hmangin tui pump theih a la ni lo tih a sawi a. Soft Starter hi rang taka company ah chah nghal niin tunkar tawp, November 29, 2025-ah chuan hman leha Electric hmanga tui pump leh theih beisei a ni tih a sawi.

PHE Sr. EE chuan Electric hmanga tui pump theih a nih loh chhung hian Diesel Engine-in nitin darkar 8 chhung tui pump thin tho niin hei hian mipui mamawh khawp erawh a pha lo hl tih sawiin, “Diesel Engine hian darkar khat-ah diesel litre 80 lai a mamawh avanga a hautak avangin mipui mamawh khawp pump theih anih loh chungchang ah PHE Department chuan Serchhip mipuite hriat-thiamna an ngen tak meuh meuh a ni,” a ti a. Bialtu MLA leh PHE Department hotute hmalakna avangin Diesel Engine pumping hours chu Nov. 26, 2025 atang khan darkar 10-ah tihpun a nih thu leh hei hian tuisem pawh a tihziaawm phah deuh dawn thu a sawi a ni.

PHE Sr. EE chuan Serchhip khua-in tuisem chungchanga harsatna a tawh ah mipuite hriat-thiamna ngenin, Tuisem a ziaawm leh vat theihnan erawh theihtawp an chhuah mek zel thu a sawi bawk a ni.

Hetihlai hian Electric khawl chhia thlakna tur khawl thar, nimin-a Lengpui Airport rawn thleng tura beisei chu Flight cancel a nih avangin ala rawn thleng thei lo nia thudawn a ni thung.