EMRS inelna ah Mizoram in Medal 24 an la

Ramchhunga Eklavya Model Residential School hrang hrangte infiamna lama inelna neih zawh takah Mizoram aiawhte chuan Medal 24 an la.

National Education Society for Tribal Students (NESTS), Ministry of Tribal Affairs hnuaia Eklavya Model Residential School hrang hrangte tana buatsaih ‘4th National EMRS Sports Meet’ hi November ni 11 atanga November 15, 2025 chhung khan Sundargarh, Odisha State-ah neih a ni a. He hunah hian State 21 telin infiamna hrang hrang hmang a intihsiakna neih a ni a. Mizoram-a Eklavya Model Residential School (EMRS) 11 te atang pawhin he National Sports Meet a tel tur hian zirlai naupang Hmeichhia 23 leh Mipa 47, an vaiin mi 70 bakah Escort mi 7 (pasarih) leh Contingent Manger pakhat, an vaiin mi 78 an tel a. Mizoram State aiawh a kal te hi inelna hrang hrang neihah an che tha hle a, infiamna hrang hrang Individual item leh Team event-ah te Gold Medal 9, Silver Medal 9 leh Bronze Medal 6, a vaiin Medal 24 an rawn hawn a ni.

Tun dinhmunah Mizoram EMRS Society, Planning & Implementation Department hnuaiah hian RD Block 11-ah CBSE Affiliated Residential School (EMRS) 11 awm mekin, zirlai naupang 2400 enkawl mek an ni a. EMRS ah hian Class VI atanga Class-XII thleng awmin, zirna leh zirna kawng a naupang mamawh te chu a thlawn vek a pek thin an ni.