Serchhip-ah ‘Sardar @150 Unity March’ neiin Faina beihpui thlak nghal a ni

Nimin khan Serchhip-ah Sardar Valabhai Patel pianchamphaphak vawi 150-na denchhenin ‘Sardar @150 Unity March’ chu neih a ni a, he hunah hian zirlai rual ten Govt. Higher Secondary School, Serchhip atanga Serchhip Bawrhsap Pisapui thleng kawng an zawh a ni.

Sardar @150 Unity March-a tel te hi GHSS Serchhip Tual atangin Serchhip SP, Gavit Gogna chuan vailiamin, he hun buatsaih a nih chhan a sawi a, India ram chu ram bung hrang hrang, lal hrang hrangin an thut thin leh Princely State tam tak a inthendarh an nih thu sawiin, tuna India ram kan hriat tak hi British Sawrkar laka India a zalen hnua piang a nih thu a sawi a. Princely State tam tak a inthendarh te chu Sardar Valabhai Patel-a leh ram hruaitu hmasa te hmalaknain India ram bung khatah chhunkhawm an ni a, tuna India ram kan tih a lo pian theihna tura mi pawimawh ber te zinga mi a nih avangin a piancham vawi 150-na ah he hun ropui tak hi hman a nih thu Serchhip SP chuan a sawi a ni.

Nimin-a Unity March neih a nih rual hian Faina Beihpui thlak nghal niin hemi pual hian Leisekawt Mual-ah hun hman a ni bawk a, he hunah hian District Urban Development Officer (DUDO) Gaston Vanlalhriatpuia chuan faina leh thianghlimna a taka nunpui a tulzia sawiin, India sawrkar in Faina kawnga hma a lakna hrang hrangte a sawifiah bakah he hmalakna tihlawhtlingtu ni turin he huna kalkhawm zirlaite chu a fuih a. Kawng zawhtu zawng zawng te hian kawng tluanin bawlhhlawh an chhar fai a, fai inzirtirna leh faina hnatlang inkawp an nei nghal a ni.

He kawngzawh hi Serchhip DC Pisa Tual-ah a kharna hun hman niin he hunah hian District Bawrhsap Paul L. Khuma chuan engkimah thawhhona tha leh tanrualna a pawimawhzia te; chhungkua, Kohhran, sawrkar leh hnathawhna hmunah te inlungrualna, inpumkhatna leh tan-rualna pawimawhzia te sawiin, Unity March atang hian zirchhuak turin mipuite a sawm a ni.

Nimin-a he kawngzawhna bul tanna leh a kharna hun bakah Leisekawt Mual-a hun hman ah te hian Sub-Hqrs. YMA Cultural Troupe ten Mizo Hnam Lam an entir a, Mera Yuva Bharat (MY Bharat) Serchhhip-a Office Assistant F. Lalruatmawii chuan lawmthu sawina hun hmangin he kawngzawh hi tihtawp a ni a. Zirlaite leh Zirtirtu mi thahnem tak an tel a ni.