LADC Inthlanpui atan Campaign vanglai a thleng mek

Karleh Nilaini, December 3, 2025-a Lai Autotomous District Council (LADC) inthlan awm turah State Election Commission (SEC) ruahmanna hnuaiah thuneituten tluang takin inthlang tura inbuatsaihna an kalpui mek a, Political Party leh Candidate leh anmahni puitute pawhin theihtawp chhuahin vote an zawng mek.

MDC Bial 25 awmna LADC-ah hian Campaign boruak in a vanglai a thleng chho tan a. Candidate leh anmahni puitute chu In tin-a lutin anmahni vote tura ngen chu Campaign hmanrua hman rim leh langsar ber a ni a, Political Party ten Star Campaigner tura an ruat te pawhin theihtawp an chhuah mek bawk. Chief Minister Lalduhoma leh MNF President Zoramthanga te pawhin LADC Inthlan atan beihpui thlakin Lawngtlai an tlawh tawh a. MPCC Vice President C. Ngunlianchunga chuan Lawngtlai thutchilhin an party candidate te a campaign pui mek a ni.

Lawngtlai District MPF hruaitute chu Inrinni khan Lawngtlai a Political Party hrang hrang Pisa-ah lengin LADC inthlanpui neih turah inthlanna thianghlim leh felfai a awm theihna tura hmalak dan tur an sawipui a. Lawngtlai District MPF hruaitute hi MNF, ZPM, INC leh BJP Office-ah lengin, LADC inthlanpui neih tur ah inthlanna thianghlim leh felfai a awm theih nan thawhpuiah a sawm a. Political Party hrang hrang hian an party Policy an lo hrihfiah a, Inthlanna thianghlim a awm theih nan thawhhopui an tum thu an lo hrilh hlawm a ni.

Lawngtlai District MPF chuan Candidate tinte chu sum hmanga vote lei lo tur leh therhlo engemaw hmanga vote zawng lo turin an chah a, Candidate-te chu an tihhlawhtlin theih loh tur manifesto nei lo turin a chah bakah ECI in inthlan inkaihhruaina, Model Code of Conduct (MCC) a duan chu bawhchhia an awm tih an hriat chuan dan anga hrem an nih theih nan thuneitute hnena an thlen tur thu an hrilh bawk a ni.