Sipai ram chhuahsan hman dan tur reltu Advisory Committee atangin CESJ an inhnukdawk

Aizawl-a Assam Rifles ram chhuahsan hman dan tur reltu Advisory Committee thutlukna siam danah an ngaih a that loh avangin CESJ chuan Committee Invitee an nihna atangin an inhnukdawk tih an sawi.

Nimin khan CESJ hruaituten Aizawl Press Club-a thuthar thehdarhtute an kawmna ah Centre for Environment and Social Justice (CESJ) General Secretary, Lalduhawmi Chawngthu chuan Advisory Committee Meeting thutlukna siam danah CESJ aiawha tel thinte an ngaih a tha lo tih sawiin, Advisory Committee-a Invitees anga an tel zel chuan Sawkarin Assam Rifles chhuahsan ram, a duh ang anga hman remtihpuitu atan chauh an tel ve nia a lan dawn avangin an pawl tan tel ve zel chi nia an hriat loh thu a sawi a ni.

CESJ hotute chuan Hmawngbuchuah thleng Rel kawng kal tir tura ruahmanna chu hna thawh tan a la nih loh avangin theihtawp chhuaha a tawp thlenga dodal an tum thu an sawi bawk a, hei bakah hian Mizoram a Gorkhali awm te’n Other Backward Classes (OBC) pek an beisei chungchangah thangthar awm leh zel turte tana hna zawn kawnga harsatna thlen theitu a nih avangin OBC Status pek chu an duhlo tih an sawi bawk.