LADC Inthlan ah MNF beiseina a sang tih sawi

MNF party chuan nimin khan Aizawl-a Mizo Hnam Run-ah Chhung Inkhawm neiin MNF Vice President Vanlalzawma chuan Lai Autonomous District Council inthlan lo awm turah hian beiseina sang tak an neih thu a sawi a, “Pathian leh mipui zarah hnehna kan chang leh ngei dawnin kan hria a. LADC-ah sawrkar ngelnghet din turin MNF a inbuatsaih a ni,” a ti.

MNF Vice President chuan MNF an sawrkar leh a nih chuan mipui nawlpuiin an chhawr tam theih tur development kalpui kawngah ngaihtuahna zau zawk an put a pawimawh thu sawiin, “Miretheite thleng phak hmasawnna tak tak thawk turin kan inbuatsaih a tul a ni,” a ti a. “MNF hi party dang nen kan inang lo a. Nationalism zungzamin MNF chu min phuar reng tur a ni; nationalism kalsan thiang kan ni lo. Hnam tana nunna thap ngam MNF te i in tuaithar ang u,” tiin kalkhawmte chu a sawm a ni.

Hetihlai hian MNF Sr. Vice President leh Dampa Bialtu MLA atana thlan thar Dr. R. Lalthangliana chuan Dampa Bial hrang hrang fang chhunzawm zelin nimin khan Hnahva leh Silsuri te a tlawh a, amah leh MNF fel leh that vang ni lovin, Pathian malsawmna avang chauha tling a nih thu sawiin, Pathian leh Dampa mipui hnenah lawmthu a sawi a ni.