Serchhip District khaw 23-a chhungkaw 552 ten kumin ah Thingtam avangin harsatna an tawk

Kumin-a Mizoram-a Thingtam chu khaw 180 ten tuarin District hrang hrang zingah Mamit District chu a tuar nasa ber an ni a, Serchhip District-ah pawh khaw 23-a chhungkaw 552 ten Thingtam hi tuarin tunah chuan Sazu puang pawhin ziaawm lam a pan tawh nia hriat a ni.

Agriculture & Farmer Welfare Department hotute chuan Rawthing par avanga kumin-a Thingtam lo thleng hi Mizoram District 11 te an tuar vek nia sawiin, Thingtam avanga Sazu puang hi khaw 180 in tuarin chhungkaw 5317 ten an thlai thar tur zaa 42.06 an chan phah niin an sawi a, nikum February thla khan Mamit District-a Hriphaw khua ah Rawthing hi a tam tan a, nikum vek khan Lunglei District-a Vaisam, Mamit District-a khaw 12 leh Aizawl District-a Lungsei, Samlukhai leh North Lungleng-ah te a Tam leh a, kumin ah erawh Mizoram District zawng zawng tuamin hriat theih chinah 147-ah Rawthing hi a tam a ni. Nikum atang vek khan hmun hrang hrangah Thangnang puang bawkin kumin kumtir lam atang khan Sazu a puang leh bawk a, kumin September thla vel atang khan thlai eichhe tanin Sazu puang avang hian District 11-a khaw 180-a loneitu chhungkaw 5317 te Lo, Tin 4306.9 a zau a chhia a, loneitu ten a tharchhuah tur za zela 42.06 an hloh phah nia chhut a nih thu a sawi bawk.

Sazu puang hi Mamit District in tuar nasa berin khaw 52-a chhungkaw 2009 ten an tuar a, Lunglei District in dawtin khaw 34-a chhungkaw 1071 ten harsatna an tawk a, Serchhip District chhungah pawh khaw 23-a chhungkaw 552 ten harsatna an tawk a, Tin 434-a zau-a buh leh thlai za zela 61 vel a tichhia nia chhut a ni a, hmun hrang hrangah Tur hmangin Sazu suat hna thawh a ni bawk.

Sazu puang avang hian hmun hrang hrang ah Tur hmangin Sazu suat hna thawh a ni a, hriat theih chinah Sazu thi 32,375 chharkhawm ni tawhin khaw 18-ah erawh chuan Sazu Tur hi hman a ni ve lo a, heng khua bikah hian Tin 486.5-a zau a sehchhiat sak a, hei hi Sazu puang Lo a tihchhiat zawng zawng atanga chhutin za zela 23.66 a tling a ni.