Hawng 440 kaihhnawih thubuai ngaihtuah mek zel

Heroin hawng 440 man thubuai a man leh Jail-a tang mek Henry Lalbiakzinga Bail dilna chu Court in a hnawl sak.

Kumin March ni 13-a Champhai District chhung Hruaikawn kawnga Zokhawthar Police te'n Heroin hawng 440 an man tuma a neitu ber nia puh, Henry Lalbiakzinga thubuai chu ngaihtuah chhoh mek a ni a, he ruihhlo neitu a puh Henry Lalbiakzinga hian Special Court, ND&PS Act. Champhai Judicial District-ah bail a dil a, a dilna hi tunkar Thawhtanni khan Special Court, ND&PS Act. Champhai Judicial District chuan ngaihtuahin Henry-a Ukil leh sawrkar Ukil te thusawi ngun taka a ngaihtuah hnuah Bail a dilna hi a hnawlsak ta a ni.

Henry Lalbiakzinga Ukil te hian Henry-a kut atangin dan phalloh thil engmah an man loh thu te, a hriselna a that loh thu te, man a nih laiin BNSS Section 47 leh 48 in a phut anga man a nih chhan hrilhhriat a nih loh thu bakah a chhungte leh a laina hnaite pawh hrilh an nih loh thu te hmangin Bail hi an dil sak a. Hetihlai hian sawrkar Ukil te chuan Henry Lalbiakzinga hi he thubuai ah hian a inhnamhnawih ngei nia lan thu leh amah an manna ah dan bawhchhiatna a awm loh thu an sawi ve thung a, Henry-a hi thiam loh chang thei dinhmuna ding a nih avangin thubuai ngaihtuah a nih laia lo chhuah lailawk chu a rem loh thu Court-ah hian an sawi ve thung a ni.

Special Court, ND&PS Act. Champhai Judicial District chuan sawrkar Ukil te thu sawi chu pawmpuiin Henry Lalbiakzinga hi thubuai ngaih-tuah a nih lai chuan Jail-a la awm rih turin thutlukna a siam a, Court chuan ‘ND&PS Act. Section 35 leh 45 hnuaiah Henry-a hian hre reng chunga dan phal loh ti anga ngaih tur a ni’ tiin bail a dilna hi a hnawlsak ta a ni.

He case ah hian Henry Lalbiakzinga tan hian Lalchhuansanga Sailo a ding a, Sawrkar tan hian Special PP Vanlalhumi a ding thung a ni.