Sawrkarin Truck neitu leh khalhtute harsatna a hre reng tih PWD Minister in a sawi

PWD Minister Vanlalhlana chuan Sawrkarin Truck neitu leh khalhtute harsatna a hre reng tih sawiin, Mizoram-a inkalpawhna kawng te pawh siam mek a nih thu a sawi.

Bawngkawn-a Mizoram Truck Owners' Association (MTOA) Office thar nimin-a a hawnna ah PWD Minister Vanlalhlana chuan Sawrkarin Truck neitu leh khalhtute harsatna a hre reng tih sawiin, Kawnpui leh Khamrang inkar kawngpui chu NHIDCL kutah awm tawh mah se PWD-in a vilpui thin thu leh Khawthlang lama an mu tan, NH44A hna hmabak pawh Ministry-in cheng vbc. 134 an rawn sanction tawh thu leh tunah hian Tender chhuah mek a nih thu a sawi a. He kawng atana 'One Time Improvement' thawhna tur cheng vbc. 48 pawh Regional Office-ah a inchiah mek thu a sawi bawk. 

PWD Minister chuan Aizawl-Thenzawl-Lunglei (ATL) Road pawh hna thawh tan theih a nih phat atangin official-ten hma an la nghal tih sawiin, Lunglei khawpui chhung kawngpui chu Krismas hmaa Blacktop tum a nih thu leh Aizawl khawchhung Re-Surfacing pawh kalpui mek a nih thu a sawi a, nakum March thla tawp lama zawh theih an in beisei thu sawiin, Supreme Court atangin a khat tawkin thil tih tihhlawhtlin tur ruahmanna a rawn siam thin a, Tun dinhmunah Speed Limiting Device vuah vek turin a rawn ti a, Hei bakah hian Transport Department hmalakna in Weighbridge hmangin bungraw phur Truck-te buk thin a ni chu phurrit-a la mai lova, an him tlanna tur zawkte, kan kawngpui a tlo zawkna tur a ni tih hre thar turin a chah bawk.

Truck neitu leh khalhtute chu kan ram sum chetkual dan (Economy) innghahna pawimawh tak an nih thu pawh Minister chuan sawiin, mipui nitin mamawh Insakna bungrua leh bungraw pawimawh chi chi hrang hrang chetvelna kawngah mawhphurna pawimawh tak neitu an nih thu a sawi a. MTOA member-te hnathawh chu chhungkaw tin a thleng a, chhungkaw tam tak eizawnna an chungah a innghat tih a sawi bawk.

MTOA-ah hian OB mi 7, Executive Committee Member 14, Sub-Headquarters 4 (Kolasib, Champhai, Lunglei leh Lawngtlai) Member 440 leh Truck 600 an awm mek a ni.