Mizoram Larsap-in Rajya Puraskar Award a sem

Mizoram Bharat Scouts & Guides (MBS&G) in State Award a pek theih sang ber, Rajya Puraskar Award/Governor's Award chu nimin khan Larsap General (Dr) Vijay Kumar Singh chuan mi 149 te hnenah a hlan.

Hemi puala inkhawm Raj Bhavan Durbar Hall-a neih ah Larsap General (Dr) Vijay Kumar Singh chuan chuan Rajya Puraskar Award dawngtute chhuanawm a tih thu sawiin, hmasawnna tur tam tak an la neih avangin an thlen chinah tawp mai lova, ram pum huap Scouts & Guides chawimawina sang ber - Rashtrapati Puraskar dawng thei tura theihtawp chhuah chhunzawm turin a fuih a. Mizote theihna, khawtlang inenkawlna leh nunphung thlirin Rashtrapati Puraskar dawng thei tur tam tak an awm theih ngei a beisei thu a sawi a. Rajya Puraskar dawn chu Scouts & Guides nuna hlawhtlinna ngaihhlutawm tak a nih thu sawiin, hei hian inpekna, beih hram hramna, rawngbawlna leh than zel duhna a entir a ni, a ti a. Chawimawina an dawn chuan tun hun mai ni lo, an thanlen zelna tur kawngah nasa taka a puih dawn thu a sawi a ni.

Larsap chuan Scouts & Guides pual Camp buatsaih leh Classroom atanga an thil zirte chuan khua leh tui tha chherchhuah kawngah awmze thui tak a neih thu sawiin, an thiamna leh hriatna te chu faina, chhehvela thil awmte ngaihsakna leh khawtlang rawngbawl sak nana hmang turin a fuih a. Mizoram leilung mawina, boruak thianghlim, ramngaw hausakna, lui thianghlim leh hnam ziarangte venghimtu ni a, vantlang hriselna siamtu nih tum turin a chah bawk a. Mizoram Bharat Scouts & Guides Chief Patron a nih angin Mizoram Scouts & Guides thanlen zel nan theihtawp chhuah a tum thu a sawi bawk.

Rajya Puraskar Award dawng thei tur hian Tritiya Sopan Level chin tal thlen a ngai a, Scouting/Guiding skill lama thiamna tha tawk tak nei, vantlang rawngbawlna leh hmasawnna kaihhnawih hmalaknaa tel tawh bakah Rajya Puraskar Scouts & Guides Testing Camp paltlang tawh an nih a ngai a. 2024 Batch atangin Mizoram pumah Scouts & Guides 149 (Scouts 64, Guides 85) te'n he chawimawina hi an dawng a ni.