MSPMC ten Kolasib-ah hnathawh an enfiah

Mizoram State Project Monitoring Committee (MSPMC) chuan nimin khan Kolasib District-a Sawrkar hmalakna hrang hrang leh hmasawnna ruhrel thawh mekte a hmunah an enfiah.

MSPMC hian an Vice Chairman R. Lalrinawma hova Kolasib District hi tlawhin Thingdawl Agriculture Farm an tlawh hmasa ber a, hetah hian thawktute nen an hmalaknate an sawiho a. Thingdawl-ah hian Alu chi tur 'Solar Powered Cold Storage' leh 'Seed Processing Unit' te an tlawh nghal a ni. Hemi hnu hian Kolasib I&PR Conference Hall-ah inhmukhawmin hetah hian Team hnih-ah inthenin Kolasib chhunga sawrkar hmunhma Project hnathawh mekte tlawh turin an chhuak zui a. Kolasib khaw chhungah hian khum 100 lenna District Hospital sak mek leh District Jail thawmthat mek te an tlawh a. Heng bakah hian Project Veng-a Fast Track Court sak mek te, Revenue Staff Quarters Complex sak mek te leh DIC Flatted Factory sak mek te an tlawh bawk a. Heng hmunah te hian an hnathawh dante uluk taka enfiahin, Department aiawhte, Contractors leh Engineer-te nen inkawmhona hun tha tak an hmang a ni.

Kolasib District an tlawhnaah hian MSPMC Vice Chairman R. Lalrinawma chuan tihdiklohna lai zawng tur ngar ngara kal an nih loh thu sawiin, Hna tha zawk leh chak zawka thawh a nih theih nana hmalakna te sawiho tura kal an nih thu a sawi a. Department hotute, Engineer leh Contractor-te chu an hnathawh kawnga an harsatna te sawilang turin a chah a, sawrkar-a thlen ngai a awm pawhin a tul anga an thlensak tur thu a sawi bawk. Amaherawhchu, hna dik leh tlo, a sanction a nih ang taka thawh chu an tihmakmawh a nih thu a sawi bawk.