Mizoram-ah rampawn atanga raltlan 33,171 leh State dang atanga raltlan 6,953 an awm mek

Mizoram chhungah Myanmar leh Bangladesh atanga raltlan rawn lut mi 33,171 leh Manipur atanga raltlan mi 6,953 an awm mek nia hriat a ni a, Myanmar atanga Mizoram-a raltlan rawn lut te kutzia leh mitnaute thla lak (Biometric Enrolment) hna thawh mekah za zela 60 dawn zawhfel a ni tawh bawk.

Home Department atanga thudawn danin Mizoram-a Myanmar raltlan awm mek mi 31,214 ni thin chu tunhnai ah tlem leh hretin mi 30,815 awm mek anga chhinchhiah a ni a, an zinga mi 18,265 te chu Biometric Enrolment a chhinchhiah an ni tawh a, hei hi raltlan awm zat atanga chhutin za zela 59.27 a ni a. Bangladesh raltlan Mizoram-a awm mi 2,356 chhinchhiah ni bawkin an zinga za zela 11 dawn chu an kutzia leh mitnaute thla laksak an ni tawh bawk a ni. Aizawl District-ah Myanmar raltlan 4,000 bawr vel an awm a, an kutzia leh mitnaute thla laksak hna hi zawhfel tep a ni tawh a. Raltlan awm tam berna Champhai District leh a dawttu Lawngtlai District-ah te erawh chuan an thathnem tham em avangin za zela chhut chuan chhinchhiah zat a la tam thei lo thung a ni.

Sawrkar chhinchhiah danin Myanmar leh Bangladesh atanga raltlan rawn lut hi Mizoram-ah mi 33,171 an awm mek a. Manipur a chi leh chi intihbuai avanga rawn raltlan mi 6,953 an awm mek a, heti hian Mizoram-ah raltlan mi 40,124 an awm mek nia chhinchhiah a ni.

Mizoram leh Myanmar ramri thui zawng hi km 510 angin Home Ministry chuan a chhinchhiah a, Mizoram sawrkar chhinchhiah dan erawh chuan km 404 a thui a ni a. Mizoram Police Duty Post 12 awmin Assam Rifles ten Duty Post engemaw zat an nei bawk a. Mizoram leh Bangladesh ramri thui zawng chu km 318 niin Mizoram Police Duty Post 6 leh BSF Duty post engemaw zat a awm bawk. Manipur nena inrina-ah Mizoram Police Outpost 8 a awm a, Assam nena inrina-ah Outpost 22 awmin Tripura nena inrina-ah Outpost 6 a awm bawk a ni.

Free Movement Regime (FMR) hnuaiah Myanmar nena ramri paltlang te Border Pass pek thin a ni a. Kumin October ni 30 thleng khan Border Pass hi 21,238 pek a ni tawh a. Border Pass hi hmun thum - Champhai District-a Zokhawthar, Hnahlan leh Lawngtlai District-a Zochachhuah khua-ah te pekchhuah a ni.