Serchhip-ah MUP ten Faina Hnatlangpui an nei

Mizoram Upa Pawl (MUP) Serchhip chuan nimin khan hnatlang neiin Serchhip khawpui lunlai hmun hrang hrang thenfai hna an thawk.
Swachh Bharat Mission (Gramin) hnuaia khawpui fai intihsiakna kal zelah Serchhip District MUP bultumin nimin khan Serchhip khawpui chhungah ‘Faina beihpui thlakna- Faina Hnatlang’ hi neih a ni a, he hunah hian Serchhip Town Area-a MUP Area pathum- Serchhip Area, Serchhip North Area leh Serchhip South Area atangin MUP Member mi za chuang an thawkchhuak a. Serchhip AOC Veng atanga Serchhip Bazar tan tlangin Serchhip Damdawi In bul Tuizemdum kawn thlengin faina hnatlang hi an nei a, kawngpui dung leh Bazar tual vela bawlhlawh te chhar-khawmin an thianfai bawk a ni.

Nimin-a MUP Faina hnatlang hi Serchhip AOC Veng atanga tan niin hnatlang an neih hma hian hun tawite hmangin MUP hruaitu ten thu an sawi a. MUP Serchhip District huamchhungah hian MUP Branch 50 chuang awmin nimin a hnatlang ah hian Town Area-a Branch 16 atangin MUP Member te an thawkchhuak a. Mipuite chu khawpui chhung khawlai dung bakah Bazarpui leh a chhehvel te vawngfaitu ni theuh turin an chah a ni.

MUP ten Faina hnatlang an neih a thawkchhuak te thingpui lumna atan Serchhip Bawrhsap Paul L. Khuma chuan Rs. 10,000/- a pek bakah Serchhip Kawnpui North VC te chuan Rs. 500 an pe bawk a ni.