Yashoda Hospitals-in MUHCS an zawm tih an sawi

Hyderabad-a Yashoda Hospitals chuan Mizo mipuite insengso lo zawnga damdawi lama an inenkawl theih nan Mizoram Universal Health Care Scheme (MUHCS) an zawm tih an sawi.

Nimin khan Aizawl Press Club-a thuthar thehdarhtute kawmin, Yashoda Hospitals hotute chuan Mizoram mipuiten khawvel el pha hriselna lama inenkawlna tha an dawn ve theihna turin Mizoram Universal Healthcare Scheme (MUHCS) nen an thawkho tih an sawi a, he thawhhona hnuaiah hian MUHCS kaltlanga Yashoda Hospitals, Hyderabad-a inentir te chuan Cashless leh a thlawnin inenkawlna an dawng thei tih an sawi a. Mizoram-a chengte tan Scheme hrang hrang, Mizorama sawrkar hnathawk mek leh an chhungte tan kum khat chhung a thlawn inenkawlna, Pensioner leh an chhungkaw tan kum khat-ah cheng nuai 12 chin leh General Category (GC) a awm chhungkua te chu kum khat-ah cheng nuai 85 chin te a huam a, heng bakah hian a bika inenkawlna Specialist Care: Cardiology, Oncology, Neurology, Nephrology, Pulmonology, Gastro Surgery, Orthopaedics leh Department thar tha tak tak te a huam bawk a ni.

Yashoda Hospitals chuan MUHCS an zawm atanga thla hmasa ber chhungin damlo atangin bepawptu mi 200 chuang an dawn thu leh tunah hian Yashoda Hospital chuan Cancer enkawlna atana hmanraw tha MR-Linac hmangin Mizoram atanga damlo enkawl hmasa ber turin a inbuatsaih mek tih an sawi a, cheng nuai 8 senso tur chu MUHCS hnuaiah a thlawna enkawl a ni dawn a. Hei bakah hian Yashoda Hospitals chuan Mizoram atanga damlo kalte tan Airport atanga Damdawi In thleng in lam leh in thlah, damlo enkawl chhung zawnga puitu tur ngaihtuah sak te an tih theih thu an sawi a, Yashoda Hospital a damlo inenkawl te follow-up na tur Aizawl-ah OPD an hawng bawk a ni.

Yashoda Group of Hospitals, Hyderabad-ah hian Somajiguda, Secunderabad, Malakpet leh Hitech khawpuiah Independent Hospital pali a awm a, damlo enkawlna tur khum 4000 a nei a ni.