Dawt hmanga inbeih reng khamawm tih thu sawi

ZPM Vice President C. Lalnunnema chuan dawt hmanga inbeihna a la awm reng mai chu a khamawm ta hle tih a sawi.

Nimin-a ZPM Chhung Inkhawm neih ah ZPM Vice President chuan Eptu Party ten dawtin ZPM party nasa takin an chirhtheh nia sawiin, Aizawl-a Assam Rifles Biak In hmun chungchang a sawifiah a. “Hman deuh khan Social Media-ah Pu Lalmuanpuia Punte MLA, Adviser to CM leh mi pakhat inbiakna chungchang zeldin thubawl hmangin, ‘ZPM party chuan Assam Rifle Biak In hmun hi Party Office atan neih an tum’ tiin dawtin ZPM Party chu nasa takin Opposition Party-ten min chirhtheh a. Tunhnaiah hian Opposition Party chuan ZPM Office lei chungchang leh AR Biak In hmun chungchang sawi zawm luiin, an rilru chhe tak chu ZPM min tihmualpho tum nan an rawn puang chhuak leh ta a. Hman atanga politics hri tha lo an vei kha opposition-te hian an la vei reng a, an hri vei Dawt Sawi hi an sim thei lo a nih hi maw. Keini’n politics khelh dan thianghlim leh tha zawk kan zirtir mek laiin a dik lo zawk, dawt hmanga inbeihna a la awm reng mai hi a khamawm ta hle a ni,” a ti.

ZPM Party chuan Assam Rifles ram chhuahsan chhunga Biak In hmun chu Party Office atana neih tumna emaw, AR ram chhuahsan hman tangkai dan tur chungchangah emaw ngaihdan emaw, duh dan emaw an sawi ngai lo tih pawh sawiin, “Sawrkar-in mipui aiawh zo tura a din, Pawl hrang hrang aiawh telna Advisory Committee ngaihdan leh ruahmanna chu Mizoram mipui tana tha tawkah kan ngaih avangin kan inrawlh ngai lo a ni. Assam Rifles Biak In hmun chungchang hi ZPM Party te hian Party Office hmun atana neih tum anga min puhna hi dawt a ni a. Zaa zain thu dik lo a ni,” a ti bawk.