Kumtling lo awmpui-a chhawr zirhona neih a ni

Mizoram State Commission for Protection of Child Rights (MSCPCR) chuan naupangte dikna chanvô, a bik takin inchhungkhur a inhlawhfak (awmpui) chungchângah nimin khan Consultation Workshop an buatsaih.

He Workshop Planning Department Conference Hall-a neih ah hian Mizo Hmeichhe Insuihkhawm Pawl (MHIP) Gen. Hqrs. hruaitute leh Aizawl-a MHIP Branch hrang hrang hruaitute an te MSCPCR Chairperson Jimmy Laltlanmawia chuan inlawmna thu sawiin Mizo naupangte tâna MHIP-te hmalak tawhna te chu ropui a tih thu sawiin, MHIP-te nena tangrualin State danga hmeichhe naupang an chhanchhuah tawh thu te a sawi a. Nu leh pate lakah ngêi pawh naupangte an him tawh loh thu târlangin, hmâlak a tul takzet thu a sawi a. Khawvêl changkâng zelah awmpui mamawhna a sâng zêl a, Mizoram-ah pawh awmpui tel lova awm thei lo kan awm tak nûal avângin hetiang kaihhnawih dân kan hriat leh kan zawm a pawimawh thu a sawi bawk a. Singapore sawrkar chuan awmpui chhawr chungchâng ah dân tha tak neiin, an ramah chuan awmpui ni turin kum 21 an tlin ngei ngei a ngaih thu a sawi bawk.

He hunah hian MSCPCR-a Legal Officer Priscilla Lallawmsangi leh Gauhati High Court (Aizawl Bench)-a Registrar Dr. HTC Lalrinchhana te chuan kalkhawmte zirtirna pein naupangte dikna chanvô, a bik takin awmpuite chungchânga hriattur pawimawh, dânin a tarlante an tarlang a. Heng zingah hian kumtlinglo naupangte chu an hnathawh phalsakna hmunah pawh chawlh lailawk awm lovin darkâr 3 aia rei chhawr phal an nih loh thu leh an hnathawh kârlak a chawlh hi darkâr khat (1) tal a ni tur a nih thu te; an hnathawh rei zâwng belhkhawm chu ni khatah darkâr 6 aia rêi a ni tur a nih loh thu leh zan dâr 7:00 leh zîng dâr 8:00 inkâr chhûngin hnathawka chhawr phal an ni lo tih te an tarlang a. An hnathawhna hmun hnathawh dârkâr bituk aia tlai (overtime) in chhawr phal an nih loh thu leh nikhat ah hmun khat aia tamah hnathawka chhawr kawi hi phal a ni lo bawk tih te an tarlang.

Heng bakah hian Tleirawlte hnathawka chhawrna hmunah chuan ziaka chhinchhiahna (Register) chu sawrkar thuneitu (Inspector) enfiah theihin vawn ngei ngei tur a nih thu leh chutah chuan hnathawka chhawr tleirawl hming leh kum zat te, Tleirawlte hnathawka chhawr rei zawng dârkâr zah leh an chawlh lailawk dârkâr bi te, eng hnathawk berah nge chhawr an nih leh chhinchhiah ngâi tul dang bithliah a awm chuan chhinchhiah tur a nih thu te an sawi a. Tleirawlte hnathawka chhawr an nih pawhin chawlhkâr khatah ni khat tal nilêngin chawlh hahdamna hun an nei tur a nih thu bakah an hnathawhna hmun neitu hian an hnathawhna hmun langsar lâiah he an chawlh nî tur hi a târchhuak ngei anga, thla thum danah vawi khat bak hemi chawlh nî tur hi tihdanglam theih a ni lo thung tih te an sawi a ni.