Mizo Hmeichhe dinhmun a san zel rualin an mawhphurhna a sang chho ve zel tih sawi

Social Welfare, Women & Child Development Department changtu Minister Lalrinpuii chuan Mizo hmeichhiate chu an dinhmun a san chhoh zel rualin an mawhphurhna pawh a sang chho ve zel tih a sawi.

Mizo Hmeichhe Insuihkhawm Pawl (MHIP) Special Asembly nimin-a Aizawl Vanapa Hall-a neih a hmanpuina ah Minister Lalrinpuii chuan Mizoram State Social Welfare Advisory Board din a nih atangin leh MHIP a lo pian atang khan hmeichhiate dinhmun chawikanna kawngah kan ramin hma a sawn nasa hle tih sawiin, October 17 khan Geneva-a Widows Rights International buatsaih Seminar-ah Guest Speaker-ah tangin tunhmaa Mizo hmeichhia leh hmeithaite dinhmun chhiatzia leh tunhnua an dinhmun a that chhoh zel dante thawnthu angin a sawi thu a tarlang a. Tun hma anga ei rawngbawl leh inchhung sekrek khawih chu hmeichhe hna bika ngaihnate bo tial tialin tunah chuan Bazara sumdawnna hrang hrangah leh sawrkar office hrang hrangah te hmeichhia an tam tawh em em tih sawiin, Mizo hmeichhiate hmasawnna hmun tina hmuh tur a awm ta hi thil lawmawm tak a nih thu a sawi a ni.

Minister Lalrinpuii chuan Mizo hmeichhiate chu an dinhmun a san chhoh zel rualin an mawhphurhna pawh a sang chho ve zel tih sawiin, Ruihhlo laka kan tu leh fate an filhim theih nan leh kan hnam a thanlen zel theih nan hmeichhiate pawimawhzia a sawi a, ‘Chhungkuaa letleh’ (back to the family) tih thupuia hmanga fa puitling leh hmantlak chherchhuak turin chhungkaw enkawl kawngah tan la thar theuh turin a fuih a. MHIP chu hmeichhe chanhai leh riangvaite tana innghahna tlak, rahbi tleute tana leirem an rah chho theihna tura puitu leh chhawmdawltu ni zel tura chah bawkin, an pawla politics la lut lova, MHIP chu pawl thianghlim leh mawi tak ni zel turin duhsakna a hlan bawk a ni.

Nimin-a MHIP Special Assembly-ah hian General Secretary Prof. Irene Lalruatkimi chuan report pein General Assembly, 2025-a thurel bawhzui dan ngaihthlak a ni a. State Legal Services Authority atangin mipui vantlang tana hriat makmawh dan lam thil inzirtirna hun hman a ni a. Hun hnihnaah Rorel inkhawm an hmang chhunzawm nghal a ni.