Catholic te zirna kalpui dan sawrkar pawhin entawn

School Education Minister Dr. Vanlalthlana chuan Mizoram-ah Catholic Kohhran in zirna kaltlangin danglamna nasa tak a thlen tih sawiin, Education an kalpui dan pawh sawrkar thlengin kan entawn niin a sawi.

Mizoram-a Catholic Kohhran din kum za tlin lawmna chu nimin khan Aizawl Ramthar Veng-a Bishops House-ah neih a ni a, he hun hi hmanpuiin Education Minister Dr. Vanlalthlana chuan Catholic zirna In ten Co-curricular activities uar taka a kalpui dan te chuan zirlaite hmalam hunah nasa takin a tanpui tih sawiin, State pawn a kalchhuah thlengin mahni inrintawkna a pek thu a sawi a. Catholic Kohhran in zirna kaltlangin danglamna nasa tak a thlen thu sawiin, “Education an kalpui dan pawh sawrkar thlengin kan entawn a ni,” a ti a, Pathian a innghat tlat tur leh beidawng lo turin a chah bawk.

Catholic Kohhran Centenery lawmna kharna hi nimin atang khan neih niin Pathianni thleng khian neih a ni dawn a, nimin-a hun hman ah hian Mizoram-a Catholic Zirna In hrang hrang zirlai te'n hun an hmang a, Jubilee Dar Vuak-na leh Mass neih a ni bawk. Ni thum chhung hun hman tur hi Mizoram Larsap leh Chief Minister te'n an hmanpui dawn bawk a ni.