Serchhip-ah bungrua expire tawh zawrhlai man a ni

Serchhip District Consumer Protection Council thurel bawhzuiin nimin khan Serchhip-a dawr hrang hrangah expire tawh bungrua leh eitur zawrh tam tham tak man a ni.
Tun thla ni 13 khan Serchhip District Consumer Protection Council thutkhawm hi neih niin Serchhip District chhunga dawr hrang hrangah expire tawh bungrua lo zuar ru an awm thu leh hralhchhuak thin an awm tih report tam tak a awm avangin Health Department hnuaia Food & Drugs Administration te, Police, Consumer Union leh Legal Metrology ten hma lo la se an ti a. Hemi bawhzuina atan hian nimin khan Serchhip-a Dawr hrang hrangte chu a thawh khatna atan enfiah niin eichawp thil chi hrang hrang, a siamtu ten a expire hun tur an siam pel tawh chunga la zawrh tam tham tak an man a, heng te hi hralh theih tawh loh tura chhinchhiah niin Dan angin a tul anga hmalak zui tur a ni ang.

Serchhip District Consumer Association te chuan mipuite chu eitur lam chi an lei dawnin a him dam em? A expire tawh em tih te uluk taka enfiah hmasa thin turin an ngen tih nimin khan thuchhuah siamin an tarlang a. Eitur expire tawh reng reng lei lo turin mipui te an ngen bakah dawr neitute leh sumdawng te chu mipui te hnenah eitur him lo (expire tawh) zuar chhuak lo turin an ngen tih an sawi bawk.