Operation Jericho kalpui mek sawihona neih a ni

Ruihhlo Do Beihpui-Operation Jericho kalpui mek chungchanga hmalak zel dan tur chu nimin khan Siaha-ah Home Minister K. Sapdanga hovin sawiho a ni a, Home Minister chuan Operation Jericho chu thalaite nunna chhan nan kalpui a nih thu a sawi.

Siaha Bawrhsap leh SP te nen an inkawmna ah Home Minister chuan, Siaha District in ruihhlo dona lamah theihtawp an chhuah avangin Mizoram Police, Excise & Narcotic, tlawmngai pawlte hmalakna a fak thu a sawi a, Siaha Bawrhsap hmalakna chhuanawm a tih thu sawiin, Siaha khawpui chhungah thalai 30 leh 40 inkar ruihhlo khawih awm mek chu District dang aiin a tlem nia a hriat thu a sawi a, Siaha District chu ruihhlo awm lohna-Drug Free District ni turattan la leh zual turin a fuih bawk.

Home Minister chuan Operation Jericho chu thalaite nunna chhan nan kalpui a nih thu leh Champhai District khaw 22-ah tan phawt a nih thu a sawi a. Champhai District-ah chuan NGO te nen tangkawpa kalpui a ni tih sawiin, September ni 21 atangin khaw 22 chu kharphui tawh ang tluk niin ruihhlo tawlhruk a ziaawm tawh thu a sawi a, Champhai lam a rem deuh tawh ti tih a, a kalkawng chu chhim lamah an hmang tan tih thuthang a awm avangin Operation Jericho kalpui dan chu hriatchian a duh thu a sawi a ni. Home Minister chuan Aizawl Khawpui chhunga ruihhlo ngawlvei te an huangtau hle tih sawiin, Operation Jericho hnuaia NGO ten ruihhlo ngawlveite chaw an pek thin pawh khap a nih thu leh tlawmngai pawl leh kohhran nena tanhona chuan a hlawhtlinna rate a ti sang hle tih a sawi bawk.