ZDU buatsaih ‘Fimkhurna Hapta’ hman tan niin Serchhip-ah Hapta hawnna hun hman a ni

Zoram Drivers’ Union (ZDU) chuan kumin atan ‘Fimkhurna Hapta’ an hmang leh tan ta a, Serchhip-ah pawh nimin zing khan he Hapta hawnna hi neih a ni a. Aizawl-ah chuan Transport Minister Vanlalhlana hovin he Hapta hawnna hun hi hman a ni bawk.

ZDU Sub-Hqrs. Serchhip chuan nimin zing khan Serchhip Bazar-ah ‘Fimkhurna Hapta’ hawnna hun hi hmangin Serchhip-a District Transport Officer (DTO) Vanlaldika chuan khuallian niin a hawng a, kum 1957-ah ZDU chu lo dingin mipuite an kal duhna hmunah te an thlen thin mai bakah ei leh bar lakluhna kawngah pawh hna tha leh tangkai an lo thawh tawh thin thu a sawi a. Hei mai bakah hian anmahni pawl Member te pawhin Zu avanga harsatna tawk lova nunkawng dik leh tha an zawh theihna turin ‘Ramthim Board’ te siamin a hnuah De-addiction Centre-cum-Rehabilitation Centre te pawh an siam thu a sawi a. Chumi baka kumtin ‘Fimkhurna Hapta’ an hmang thin pawh lawmawm a tih thu a sawi a ni.

Serchhip DTO chuan kumin-ah thla ruk (6) chhungin India ramah Road Accident avanga thi report mi 29,000 chuang an awm thu sawiin, report loh pawh tam tak an awm a rinawm tih a sawi a. Serchhip-ah ngei pawh lirthei chetsualna kaihhnawih a thi an awm ve fo thu sawiin, hei vang hian lirthei khalhtute leh kawngpui hmangtute kan fimkhur thar fo a tul thu a sawi a. Chetsualna tam tak hi lirthei khalhtute fimkhur tawk loh avanga thleng a nih thu sawiin, lirthei khalhtute chuan an kut-ah mihring nunna thui tak a innghat tih hriain, an fimkhur a pawimawh zia a sawi a. Lirthei khalhtu zingah thinchhe tak an awm thin thu pawh sawiin, thinrim chunga lirthei khalh phei chu tih miah loh atan a that thu a sawi bawk a ni.

Serchhip-a ‘Fimkhurna Hapta’ hawnna hun hi ZDU Sub-Hqrs. Serchhip President, H. Malsawma chuan a kaihruai a, he Hapta hman chhung hian ZDU Member te hian he Hapta puala ‘Flag’ an siam chu an zuarchhuak dawn a, he Hapta hi tunkar chhung zawng hman tur a ni ang.

Road Safety Week - Fimkhurna Hapta’ hi Aizawl-ah chuan nimin khan Transport Minister Vanlalhlana chuan Aizawl Sairang Road-a ZDU General Headquarters Office-ah a hawng. Thla thar December 1 thlenga hman tur Fimkhurna Hapta hawnnaah hian Transport Minister Vanlalhlana chuan November ni 25 atanga December ni 1 thlenga Road Safety Week hman tur chu mipuite hnena fimkhurna thuchah leh mawh-phurhna inhriattirna hun pawimawh tak a nih thu a sawi a. Road Safety chuan lirthei khalhtute chauh huam lovin, kawngpui hmangtu zawng zawngte a huam thu leh fimkhurna kawngah pawh mitinin mawh an phurh thu a sawi bawk a. Lirthei khalh laia rilru pek tawk loh te, hmanhmawh luat avang vanduaina tawk leh nunna chante an awm thin chu pawi a tih thu sawiin, Sawrkar chuan vantlang himna tura Dan a siamte chu mitinin ngai pawimawh zel turin a chah nghal bawk a ni.

Aizawl-a 44th Road Safety Week hawnna hun ZDU General Hqrs. President F. Dosanga chuan a kaihruai a. Mizoram hmun hrangah a rualin Road Safety Week hawnna hun hi hman a ni a.  Zoram Drivers’ Union hmalakna hian lirthei khalh chungchanga ‘Fimkhurna Hapta’ hi kum 1981 atanga khan ‘Drivers' Week’ tih hming puin hman tan a ni a. Kum 2007 atangin ‘Road Safety Week’ ti a thlakin kumtin hman thin a ni.