Mizoram-a Rel service mek tihchangtlun dan tur Railway Minister hnenah Chief Minister in a thlen

Chief Minister Lalduhoma leh Union Railway Minister Ashwini Vaishnaw te chu nimin khan New Delhi-ah inkawmin Mizoram-a Rel Service mek tihchangtlun dan tur hrang hrang an sawidun a, Mizoram atanga Rel tlan dan thenkhat pawh tih danglam tum a ni.

Nimin khan Chief Minister Lalduhoma leh Union Railway Minister Ashwini Vaishnaw te hi New Delhi-a Railway Bhawan-ah an inkawm a, he hunah hian Chief Minister chuan Thenzawl Peace City Master Plan siam mek a nih avangin Sairang to Thenzawl Railway alignment chu peihfel vat a tul thu sawiin, Railway Minister hian February, 2026 ralhma ngeia peihfel an lo tum tur thu a sawi a. Sairang atanga Guwahati thleng Rel kal mek chu passenger-te awlsam zawkna turin Guwahati hi zing dar 4:30-a thleng thla hman tura a kal hun siamrem Chief Minister chuan rawtin Railway Minister rawtna hi a lo pawm a ni. Hei bakah hian tuna Sairang leh Delhi inkara Rajdhani Express tlan mek pawh Delhi thleng thla turin darkar 42 leh minute 20 a mamawh avangin hemi chungchang hi Chief Minister chuan thlenin, kawng tawi zawk zawh tir turin rawtna a thlen a. Hei hi Railway Minister chuan lo pawmsakin, kawng tawi leh rang zawk zawhtir a nih tur thu a lo hrilh a, he kawng tharah hi chuan darkar 4 velin Rel hi a thleng hma tawh dawn a. Sairang to Delhi Rajdhani Express chu khualzin an tam avangin kar khat-a vawi hnih tal tlantir turin rawtna a thlen bawk a, hei hi Railway Minister chuan lo pawmin, bawhzui nghal a nih tur thu a hrilh a ni.

Hei bakah hian Kolkata leh Sairang inkara Rel service mek zan dar 7:45-a Sairang Station rawn thleng thin chu khualzinte tana awlsam zawk turin tlai dar 3:00-a thleng tura siamrem rawtna Chief Minister hian thlenin Railway Minister hian a lo pawm bawk a, Silchar to Bairabi khualzin phur Rel, Sairang thlenga extend tur chu tlan tir (flag-off) thuai tura ngen bawkin, Railway Minister chu a hmun ngei atanga flag-off turin a sawm nghal bawk a. Railway Minister chuan hun remchang a lo zawn tur thu a lo hrilh bawk a ni.

He inkawmna ah hian Chief Minister chuan Mizoram-ah ILP tha taka kenkawh a nih theih nan leh hnamdang khualzinte awlsam zawk nan Mizoram ILP Portal chu IRCTC Train Ticket Portal-a dahluh ve a rawt bawk a, Railway Minister chuan IRCTC hotute a lo zirchian tir tur thu a lo hrilh a. Chief Minister tawiawmtu Adviser to Chief Minister in Railway Station ramchhung a thlai thar thawnchhuah tur dah lailawkna tur Warehouse/Cold Storage din nise tia a rawt chu Railway Minister chuan an lo bawhzui tur thu a sawi bakah Mizoram Sawrkar chu Warehouse dinna tur hmun remchang lo ngaihtuah turin a ngen nghal a, thil tul dangte chu Railway Ministry-in a ngaihtuah zui theih tur thu a hrilh bawk a ni.