Sangha vawnthatna hmun tur Minister in a hawng

Sangha vawnthatna tur, ‘Cold Storage For Fisheries’ chu nimin khan Fisheries Department changtu Minister Lalthansanga chuan Ngaizel Kulikawn-ah a hawng.

Cold Storage hawnna hunah hian Fisheries Minister chuan Fisheries Department in SASCE hnuaia Sangha vawnthatna tur Cold Storage a din thei chu lawmawm a tih thu leh Fisheries Department mai bakah Sangha khawitu leh zuartute chu a lawmpui thu a sawi a. Sangha chu sa chhe hma tak mai, vawn that a nih loh chuan hralh tlak loha chhe mai thin a nih avangin Cold Storage chu Sangha khawitu leh zuartute tana hmasawnna pawimawh tak leh tangkai tak a nih tur thu a sawi a ni. Fisheries Minister chuan Sangha khawi leh a kaihhnawih lama hmasawnna tura sawrkar hmalakna thenkhat tarlang bawkin, District tina Sangha khawitu (Fish farmer) ten Sangha an neih dan leh an thar zat zirchiana, Sangha tam zawk leh lian zawk an thar theih nan Department chuan ruahmanna a siam thu a sawi a, Mizorama thar Sangha tharlam zawk ngei mipuite eitir an tum thu a sawi bawk.

Nimin-a hawn tak Cold Storage hi Special Assistance to States for Capital Expenditure (SASCE) 2020-2021 chhunga Integrated Fishery and Agro-based Processing Unit component hnuaiah sak a ni a, Horticulture Department chu Nodal Department niin he Project atan hian cheng nuai 123 hmuh a ni a. He Cold Storage-ah hian Cold Chamber pahnih awmin, Sangha Tonnes 16 vel vawng tha thei tura ruahman a ni a. Hei bakah hian thianghlim leh felfai zawka Sangha zawrhchhuah theihna tur pawh he Cold Storage Building-ah hian siam niin, a chhawng hnuai leh kawng an chung pawh tangkai taka hman theih turin sak nghal a ni bawk.