Hachhek Bial lamah kumin hian kuhva thar hlawkin a to ber tum a thleng mek nia hriat a ni

Hachhek Bial Kuhva Chingtu Pawl (HBKCP) chuan kumin-a an Kuhva thar te hralh mekin tunah hian cheng nuai 5000 chuang man an hralh tawh a, kumin ah kuhva rah an hralhna a to ber tum a thlen thu an sawi bawk.

HBKCP General Secretary Victor MS. Dawngliana chuan Akashvani zawhna chhangin kumin-a an Kuhva hralh tawh zat chu a chiah chiah an la sawi thei lo a, tuna an hriat theih chinah cheng nuai 4400 chuang man an hralh tawh thu sawiin, khaw 7 la in report lo atanga lut tawha ngaih cheng nuai 600 chuang nena chhut chuan cheng nuai 5000 chuang hret a nih dawn thu a sawi a, Fur kuhva man rawn belhchhah tur a la awm nual bawk thu a sawi. HBKCP General Secretary chuan kuhva hi nakum April thla thleng hralh an tum thu sawiin, an kuhva leitu chu Assam lam atanga sumdawngte an nih tlangpui thu a sawi a. A tam zawk chu anni hian leiin anni bakah hian Tripura atang pawhin an rawn lei nual thu an sawi a. Kuhva hralh kawngah an pawl chuan kuhva par hma atangin ruahmanna fel tak siamin a hralhna tur lam pawh fimkhur taka an ruahman lawk thu leh Mizoram leh Assam sawrkar pawh vawi duai lo an dawr tawh thu a sawi a. Hetihrual hian harsatna hrang hrang pawh an tawh thin thu leh kuhva leitu rinawm lo pawh an tawn ve zeuh zeuh thu an sawi a. Pawl anga theihtawpa hma an lak zel thu an sawi a ni.

HBKCP President Kanan Lalhlimawma chuan, kumin ah kuhva rah hralhna ah harsatna an tawh loh thu sawiin, “Myanmar atanga kuhva rah tawlhruk a rawn hluar hnuah kuhva rah hralhna ah harsatna kan tawk nasa a, a rate a hniam thin hle. Covid-19 avanga lockdown lai khan Myanmar atanga kuhva a rawn luh thlak loh avangin bag khat Rs 2,500 chho velte’n kan hralh thei a, a rate a rawn tha leh a ni,” a ti a. Covid-19 a reh hnuah kuhva rah rate a chhiat leh tak thu sawiin, “A chhan chu kuhva tawlhruk a nasat avangin State pawna kan hralhna te’n rate toin an lei ngam lo. A leitute’n anmahnia an lawhin bag khat Rs 1,200 - 2,500 te’n kan hralh thin. Tunah chuan anmahniin an lawhin Rs 2,500 aia tlawm loin kan hralh thei a, Rs 3,000 pawh a kai,” tiin, kuhva tawlhrukin ziaawm lam a pan avangin sawrkar chungah an lawmthu a sawi bawk. HBKCP President chuan kuhva huan nei zau deuhte chuan a kunga a awm laia an lo hralh lawk avangin a rate toin an hralh ve lo tih sawiin, “Kuhva tawlhruk ziaawm chhoin, kuhva rate a tha dawn tih hriat lawk a ni si lo. Kum danga a rate-in a leitu turte nen lawh hun hma daihin bag 1 Rs 1,500 hisapin an lo hralh lawk vek a ni. Hetiang hian a rate a tha chho dawn tih hriat a nih miau loh avangin, kum dang anga harsatna an tawh leh an hlau a ni,” a ti bawk.

HBKCP General Secretary Victor MS. Dawngliana chuan an pawl hnuaia khaw hrang hrangte hlawhtlinnaah an lawm thu leh a hralh tha zual khaw 10 thlanchhuah an tum thu a sawi a. Kuhva hi an huamchhungah kum 1950 chho atanga an chin tan thu leh kuhva man chu kum 1987 atanga pangngai taka an tel chhoh tan thu an sawi a ni.