Lothazawl Diak Thlahna Inkhelhpui zawhfel a ni

Thenzawl Zone Football Association (TZFA) buatsaih ‘Lothazawl Diak Thlahna Inkhelhpui’ chu nimin khan zawhfel niin he hun hi Rural Development Minister Prof. Lalnilawma chuan a telpui a ni.
He inkhelhpui kharna hunah hian RD Minister chuanThenzawl Zone Football Association hmalakna fakin, hlawhtling taka Tournament an buatsaih thei chu a lawmpui thu a sawi a. Tunlai thalaite zinga ruihhlo hluar zia sawiin, sawrkar, tlawmngai pawl leh Kohhran ten nasa takin an buaipui thu a sawi a, “Infiamna hmang hian ruihhlo bawih-a tang te a chhanchhuah theih avangin kan thiante zinga ruihhlo ti thin te chu inkhelhpui ah i sawm thin ang u,” tiin kalkhawmte a chah a. Nakin lawka kan ram hruaitu la ni tur kan thalaite an hrisel chuan kan ram a hrisel tih a sawi bawk.

‘Lothazawl Diak Thlahna Inkhelhpui’ kharna hun hi TZFA President Liantluanga Renthlei chuan kaihruaiin he Tournament hi November ni 14 atang khan tan niin Team 51 an tel a, Category hrang paruk (6): Under-10, Under-13, Under-15, Veteran, Women leh Senior Category-ah te inelna neiin Under-10 ah Vengthlang; Under-13 ah Field Veng; Under-15 ah Field Veng; Veteran-ah Vengthar; Women-ah Bazar Branch leh Senior-ah Bazar Branch an champion a ni.