Vantlang thil tichhiaa kut thlak lo turin mipuite ngen

Serchhip District Magistrate chuan sawrkar/vantlang property chunga phalna nei lova kutthlak lo turin mipuite chu a ngen a, hemi zawm lo te chu Dan anga hrem theih an nih thu a sawi bawk.
Hemi chungchanga tunhnaia thupek a tihchhuah ah Serchhip District Magistrate Paul L. Khuma chuan tunhnaiah sawrkar/vantlang property te mimalin an duh dana an lo tihchhiat leh khawih danglam report a awm nual thu tarlangin, “Vantlang thil reng reng hi phalna la hmasa lo chuan mi tupawhin (mimal emaw pawl emaw) an duh danin an ti hmelhemin an khawih danglam tur a ni lo,” a ti a. He thupek zawm lo chu Prevention of Damage to Public Property Act, 1984, section 3(i) leh (ii) in a tarlan anga hrem theih a nih thu a tarlang bawk a ni.

Serchhip District Magistrate chuan Prevention of Damage to Public Property Act, 1984, section 3(i) pawh thupek ah hian tarlangin, “Mi tu pawhin vantlang property, vantlang property (2) hnuaia tarlan ni lo chunga chhiatna thlen thei zawnga pawi a khawih chuan pawikhawihtu hremna chu kum 5 thlenga lung In tan tir leh pawisa chawi theih a ni,” a ti a. Section 3 (ii)-ah pawh mi tu pawhin building (In) emaw, eng property pawh, tui, kawlphetha leh eng siam leh sem-chhuahna te; tuialhthei sawngbawlna te; tuichhe sawngbawlna te; lunghlu siamchhuahna khur emaw (mine), thil siamchhuahna hmun (factory) leh mipui phurhkualna hmanrua emaw, inbiak-pawhna hmanrua emaw chunga pawi a khawih chuan pawikhawihtu chu thla ruk (6) aia tlem lo hrehawm taka lung In tan (rigorous imprisonment), a hun chhung kum 5 thleng pawhsei theih leh pawisa chawitir a ni ang tih pawh a tarlang.

Hemi bakah hian vantlang/sawrkar property tichhia te chu Section 324 of the Bharatiya Nyaya Sanhita hnuaiah hrem theih niin lung In tantir leh pawisa chawitir theih a ni tih pawh he thupek ah hian tarlan a ni bawk.