Education Minister in Khawzawl District a tlawh

School Education Minister Dr. Vanlalthlana chuan nimin khan Khawzawl tlawhin ‘Meet Your Minister’ hun a hmanpui bakah zirna In thenkhat leh District Education Officer (DEO) Office te a tlawh bawk.

Nimin-a Govt. Khawzawl High School-a ‘Meet Your Minister’ Programme a hmanpuina ah Education Minister Dr. Vanlalthlana chuan zirlaite fuihna thu sawiin, naupan lai hian mahni kalkawng tha tak a sial theih a, tum phawt chuan engpawh a theih a ni tih a sawi a. Nih tum te an neih chuan an nih theih dan tur leh an nih hun tur mitthlaa a taka thlen tir turin theihtawp chhuah turin a fuih a, harsatna an tawk a nih pawhin bei-dawng lova um zel turin a chah bawk. Hemi hnu hian Minister hi zirlaite nen inkawmin an zawhna te chhangin fuihna thu a sawi chhunzawm a. Minister hian rilru hriselna (mental health) lam lehkhabu leh Career Guidance lam lehkhabu chi 2 ve ve chu zirlai naupang hnenah a sem bawk a ni.

Nimin vek khan School Education Minister hian Govt. Khawzawl College, Govt. Khaw-zawl Higher Secondary School leh District Education Officer (DEO Office, Khawzawl te chu a tlawh nghal a. Govt. Khawzawl College-ah hian Principal Lalruatmawii leh College zirtirtu hrang hrangte nen inkawmin an College chungchang te, an hlawhtlinna leh an hmasawnna te bakah an mamawh leh an harsatna te an thlen nghal bawk.

Govt. Khawzawl Higher Secondary School-ah hian Minister hin zirlaite leh thawktute kawmin Zirlaite tan rilru hriselna (mental health) pawimawh zia a sawi a, Zirtirtu te'n zirlaite kaihruai thaa rilru lama damlohna (depression, anxiety etc.) an neih loh nana venghim tha turin a chah a. Khawzawl-a District Education Officer (DEO) Office a tlawhna ah hian thawktute kawmin an mamawh lo thlen te a ngaihthlak sak bakah a theih ang anga puih zel a tum thu a sawi bawk a ni.