Thil chah ah fimkhur turin chah

Serchhip District Consumers’ Association (SDCA) chuan mahni thil chah ni lo khul thu ah mipuite fimkhur turin an chah.
Hemi chungchanga thuchhuah an siamah SDCA chuan tunlai hian online atanga an thil chah ni miah lo, an address a rawn thleng, khul tura Courier Agency lam ten an tih an awm thin nia sawiin, “Heng hi inbumna a ni a, pawisa tam tak takin an khul a, mahse a chhungah bungraw chhiar leh quality lo tak tak chauh a awm thin,” an ti a. Hetiang thil rawn thawntute hian thiam takin mipui bum an tum thu leh complaint dawn pawhin complaint hleih theih lohin an address te chianglo takin an ziak thin tih an sawi a. “Hetiang avang hian mi tam takin sum leh pai tam tak kan chan phah tawh tih hriat a ni a, he thil thleng hi Serchhip District Consumer Association te chuan pawi kan ti hle a ni,” an ti.

SDCA chuan hetiang thil hi a lo awm chhan ber chu Social Media thenkhat Facebook, Instagram, Whatsapp leh a dangte a hriatchian loh fakna leh link kan click vang a ni thin tih sawiin, mitin te Social Media an hman dan fimkhur tur leh an hriatchian loh link te click mai mai lo turin an ngen tih an sawi a. Social Media vela thil man tlawm uchuak lutuka zawrh ho hi inbumna a ni tih hria a, hetiang ang chi te chah mai mai lo turin mipuite an ngen a. “Dak leh Courier atanga kan bungraw lo thleng khul tur ang chi chu keimahni duh thu ngeia kan chah a nih loh chuan khul lo turin kan inngen,” tiin Courier Agent te pawh an chah ni miahlo bungrua te man chawia mipuite khul tirlo tur leh a thawntu hnenah return mai zawk thin turin an ngen bawk.