Ruihhlo ngai enkawlna siam tura BCM Assembly-a thlen rel

Serchhip Area Baptist Council (SABC) Inkhawmpui chuan Serchhip-ah ruihhlo ngai te enkawlna hmun siam turin BCM Assembly-ah thlen nise an ti.
Mizoram Baptist Kohhran hnuaia Area Baptist Council (ABC) hrang hrang 17-ah nimin Pathianni hmang khan ABC Inkhawmpui chu neih niin Serchhip ABC Inkhawmpui vawi 29-na pawh BCM Serchhip-ah tluang taka neih a ni a, Inrinni khan khawmpui palai te chuan BCM Moria Biak In, Dinthar Veng-a Rorelna hun hmangin BCM Rorelna sang, Assembly-a thlen tur an rel zingah ‘Ruihhlo ngai te enkawlna hmun Serchhip ah BCM in siam nise’ tih chu a tel a, heng bakah hian an Kohhran inrelbawlna leh hmalakna tur hrang hrang relin, Serchhip ABC huamchhunga Zaipawl Intawhkhawm rawtna an pawm bawk a. Rorel Palai mi 134 an tel a ni.

Nimin chawhma Inkhawm ah Kohhran Upa Nemnghehna hun hman niin mi 6 te chu Upa atan hian nemngheh an ni a, ABC Puipa thlan thar ah Chairman atan Upa J. Lalramzauva (BCM Khuanghlum) chu thlan a ni bawk.

Inchhiarna atanga a lan danin Serchhip Area Baptist Council (ABC) huamchhung ah hian Pastor Bial 5 awmin Kohhran 20 a awm a, Kohhran Upa (active) mipa 110 leh hmeichhia pakhat, an vaiin mi 111 an awm a, Kohhran Upa (Retired) 12 awmin Kohhran chhungkua 1346 awmin Kohhran member mipa 3114 leh hmeichhia 3142, an vaiin 6256 an awm a, Baptisma chang mi 4857 an awm a ni.