East Lungdar dai-a Truck chesual-ah mi pahnih an thi

Serchhip District chhunga East Lungdar khaw dai-ah nizan hmasa khan bungraw phurtu Truck pakhat chu chesualin kawngthlang ah a tlanliam a, he Motor a chuang mi pahnih an boral.
Thudawn danin he Motor hi Champhai Zotlang-a cheng Lalrinthanga (33) ta leh ama khalh a ni a, Cham-phai atanga bungraw phur-a rawn kal niin nizan hmasa dar 12:00 rik hma deuh khan Biate atanga East Lungdar luh hma, East Lungdar atanga KM khat leh a chanve vela hla ah chesualin kawng-thlang ah a tlanliam a, Motorkhalhtu Lalrinthanga hi chetsualna hmunah hian boral nghalin Second Driver Rualthanchama (31). Champhai Zotlang vek chuan hliam na tak a tuar a, East Lungdar PHC-ah hruai nghal a ni a, nimin zing dar 7:30 vel khan a boral ve leh bawk a ni.

He vanduaina thlenna hmun hi East Lung-dar YMA leh thalai rual te chuan pan nghalin a theih ang angin an buaipui nghal a, vanduaina thlenna hmun hi a chhengchhiat avangin bungraw lakchhuah pawh a harsa deuh dawn niin an sawi a, he Motor hi kawngthlang ah meter 150 vel zet a lum a ni. He vanduaina a nunna chan mi pahnih te ruang hi East Lungdar PHC-a Postmortem a nih hnuah nimin khan an khaw lamah lak a ni a, Truck khalhtu Lalrinthanga hian a nupui leh a fa pathum a kalsan a, Rualthanchama hian a nupui leh a fa pahnih a kalsan bawk a ni.