MP K. Vanlalvena ‘Global Leaders Award’ hlan

Tun thla ni 6 leh 8 chhung khan Malaysia khawpui Kuala Lumpur-ah ‘Global Leaders Award Conclave and Summit 2025’ chu neih niin Global Leaders Award Conclave Programme-ah khawvel hmun hrang hrang atangin Award dawng turte an fuankhawm a. Mizoram atang pawhin Rajya Sabha MP K. Vanlalvena chu Chief Guest a nih bakah Award dawng tura thlan zingah telin chawimawina hi hlan a ni. Rajya Sabha MP, K. Vanlalvena’n Award a dawn chhan hi North East India, Myanmar, Bangladesh-a Tribal ten kum 2021-2023 chhunga harsatna an tawh chungchangah anmahni thlavang hauhna kawnga hnathawh that lawmman leh chawimawina a ni.

Global Leaders Award Conclave and Summit kumtin khawvel ram hrang hrangah neih thin niin kumin hi vawi 7 an neihna a ni a. Global Leaders Award Conclave and Summit 2025 hi Berjaya Time Square Hotel Conference Hall-ah neih niin Bizox Media Network buatsaih a ni a. Saami Tradestar Logistic Ltd ten an sponsor thung a. Khawvel hmun hrang hranga Media ten he programme hi an hmanpui bawk a ni.