Kum 10 tang turin rel sak

Hursualna lam hawia naupang kum tlinglo khawihtu Kolasib-a cheng Vanlalruata (67) chu kum 10 chhung lung In tang tur leh Rs. 7000/- chawi tura a chungthu rel a ni.

Kum 2019 January ni 15 khan Kolasib-a hmeichhe naupang pakhat, kum 8 mi chuan a serh a nat thu leh putar pakhatin a serh a khawih sak thu sawiin, hei vang hian a pa chuan a tuk-ah Kolasib Police Station-ah FIR a thehlut a. Hetianga naupang a khawih hun tak hi naupang hian sawi thei tawh lo mah se kum 2018 laihawl vel nia hriat a ni. He thil thleng hi Kolasib Police te chuan chhui zui nghalin pawikhawihtu a puh Vanlalruata hi an man nghal a. Protection of Children from Sexual Offence (POCSO) Act, 2012 hmangin thubuai an siam sak nghal bawk a ni.

He Hmeichhe naupang hi Doctor-in a endikna hnuah hursualna rawng kaiin khawih a ni ngei tih finfiah a ni a. Police te chuan an thil chhuina hi Kolasib Fast Track Court-a an thehluh hnuah Court chuan November ni 17, 2021 khan thubuai hi rel zo tawhin pawikhawihtu Vanlalruata chu thiamloh chantirin kum 10 chhung Jail tang tur leh pawisa pawh Rs. 5000/- chawi turin a lo ti tawh a ni.

Thiamloh chantir tak Vanlalruata hi Kolasib Fast Track Court in a chungthu a rel dan ah lungawi lovin Gauhati High Court-ah a zualko a. Gauhati High Court, Aizawl Bench chuan he thubuai hi a bul te atanga rel tha leh vek turin Fast Track Court, Kolasib-a Judge chu kumin July ni 29 khan a hriattir a, thla 6 chhunga rel fel vek turin a hriattir tel bawk a ni.

He thubuai rel that leh a nih chhung hian thuhretu mi 7 thu zawh an ni a. An zingah hian a chhuitu pahnih leh thuhretu dang naupang nu leh pa leh midangte bakah Medical Officer, Aizawl lama sawn tawh chu thu zawhfiah a ni. Court chuan nimin khan thutlukna hi puangin Vanlalruata chu thiamloh a chantir leh ta tho a ni.