Mipuiin Central Library an hlut

Art & Culture Department Director Carol VLMS. Dawngkimi chuan Aizawl-a State Central Library chu mipuiten an hlutin, zirlai zingah tlawhtu an thahnem thin hle tih a sawi.

Akashvani News Aizawl zawhna chhangin Carol. VLMS Dawngkimi chuan Art & Culture Department hnuaia Wing pakhat, State Central Library chu mipui, zirlai leh Competitive Exam inbuatsaih mek ten an tlawh nasat thu a sawi a. Career Guidance kalpui a nih hnuah phei chuan nitin thalai 10- 20 rual an awm reng thin niin a sawi. Hei bakah hian Ministry of Culture atanga lehkhabu leina tur kumtin an dawn atangin Mizoram pumah NGO Library kalpui a nih thu leh YMA Branch hrang hrang, Library neite hnenah kumtin lehkhabu a thlawna an sem thin thu a sawi a, tun dinhmuna Mizoram chhunga NGO Library awm zat chu 515 a nih thu a sawi bawk.

Art & Culture Director Carol VLMS. Dawngkimi chuan tun dinhmunah State Central Library-ah lehkhabu sing riat bawr an neih thu sawiin, Zirlai - Middle School, High School leh College zirlaite chu an lehkhabu chhiar awm tawk State Central Library-ah hian a awm tih hria a, hmang tangkai chhunzawm zel turin a sawm a ni.