Dawt tam tak sawi ah Chief Minister puh

MNF Party Vice President leh Eptu Leader Lalchhandama Ralte chuan Chief Minister Lalduhoma chu Lunglei Press mite hmaa dawt tam tak sawiah puhin, Dictator tak-a rorel ah a puh bawk.

Nimin-a Aizawl Mizo Hnam Run inkhawm-ah MNF Vice President Lalchhandama Ralte chuan Nov. 20, 2025 khan Mizoram Assembly tihbawrhbanna a thleng nia sawiin, Mizoram State University dinna tur chungchang ah Chief Minister-in Lunglei Press mite hmaah dawt tam tak a sawi niin a sawi a. “NEP 2020 chu India ram zirna hmasawnna tur, State zawng zawngte zawm tur ni a, hemi avang hian Mizorama zirna In te thiamna leh Certificate petu tur State University din a lo tul ta a. MNF sawrkar khan State University atan Cabinet chuan July 31, 2023 khan kan rel a. Aug 16, 2025-ah Bill Drafting Committee din a ni,” a ti a. “ZPM sawrkar thar chuan Drafting Committee hma a laktir a. March 4, 2025-ah Bill chu pass a ni ta a. MNF Ministry kha Draft Stage-ah kan awm a, a hmun tur engmah a la awm lo. A hmunhma dahtu dik tak chu anmahni (ZPM sawrkar) an ni a, Aizawl-a dah tur an ti. Kan Chief Minister tih vek a ni a, heti lam (Aizawl)-ah ‘kan tih’ a ti a, sawti lam (Lunglei)-ah MNF tih a ti thung,” a ti.

Chief Minister chu Dictator taka rorel ah puh bawkin MNF Vice President chuan “Ama hova kan pass kha amahin a lo thiat leh mai a. Ngaihtuahna fim hmang se heti hian a khawsa ang em? An rawn dil laia phal lova, MNF tih veka puh duhtu a ni. Dictator ang maia ram lu berin a duh dan a puang mai hi HTE Minister thluak fim tak hian a ngaihtuah nawn leh dawn em?” tiin “Zirna hi politicize lo turin ka ngen a. Lunglei-a State University dah tumna ni ‘tha ba rulhna’ mai mai ni lovin, an duh tak tak a nih chuan ngaihtuahna fim takin ti se, kan thlawp ang,” a ti bawk.