Champhai High School Golden Jubilee lawmna nei

Champhai High School Golden Jubilee lawmna chu nimin khan neih chhunzawm leh niin Champhai North Bialtu MLA Er. H. Ginzalala chuan a hmanpui a ni.

Nimin-a School Golden Jubilee lawmna hunah hian Champhai North Bialtu MLA Er. H. Ginzalala chuan Zirlaite tan High School chu Matric pass-na leh pawl sawnna mai ni lovin, an nungchang leh an suangtuahna te an hmalam huna an nihna siamna hun a nih thu a sawi a, High School-ah hian eng ang mi nge an nih dawn tih a intan thu a sawi a ni. He huna tel zirlaite chu tun atanga tum neih a pawimawh tih hrilhin, an tum tisang turin a fuih a, an tum ram thleng chiah lo mahse tum nei chunga lehkha an zir phawt chuan chu chuan chakna leh phurna pein, lehkha zir kawngah nasa takin a pui thin tih a sawi a, tum nei lem lova lehkha zirte sang tak thlen an harsat thin thu a sawi bawk. Zirna kawng an zawh hian dikna kawngah hruai lut se a duh thu pawh Bialtu MLA chuan sawiin, Exam Hall-ah entawn tum lo tur leh an thiam chin chin ah dik taka exam ngam thin turin a fuih a, dikna nunpui tlattu Mahatma Gandhi pawh kha Hnam Pa tia koh a lo nih tak thu leh dikna tan tlat te chu a tawpah an dingchhuak thin tih a sawi a ni.

Champhai High School Golden Jubilee lawmna hun hi School Headmaster Lalhlimthangi Khiangte chuan kaihruaiin Mizoram KVIB Chairman C. Lalremliana pawhin he hun hi a hmanpui a, he hun hi Champhai Vengthlang North VC te, Zirtirtu Pension tawh te, MHIP Vengthlang North, Champhai High School a zirlai lo ni tawh thin ten an telpui a, Eco Couture, zai, Mizo hnam lam leh intihhlimna hrang hrang a awm bawk a. Niminpiah khan School Education Minister hovin Golden Jubilee lawmna hun hi an lo hmang tawh a ni.