Kuthnathawktute tanpui duhna thinlung pu sumdawng te sawrkar in lawm takin a thawhpui thei

Chief Minister Lalduhoma chuan Kuthnathawktute tanpui duhna thinlung pu, hlawhtlin ngei tum sumdawng (investor) te chu Mizoram sawrkarin lawm takin a thawhpuiin a dawngsawng thei reng tih a sawi.

Mizoram sawrkar leh sawrkar laipui-a NITI Aayog tangkawp chuan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu niminpiah khan New Delhi-a Vigyan Bhawan-ah hmangin he hun a hmanpuina ah Chief Minister Lalduhoma chuan Mizoram chu tunhnai kum hnih vel chhungin India rama Sawhthing tharchhuak tam ber pawlah a inhlangkai nia sawiin. Mizoram tharchhuahte hi hmun danga mite aiin a quality pawh a sang deuh zawka hriat a nih thu a sawi a. Sawhthing chingtute tan Mizoram sawrkar chuan kg khat zelah Support Price Rs. 50 a pe mek tih sawiin, “Kuthnathawktute tanpui duhna thinlung pu, hlawhtlin ngei tum sumdawng (investor) te chu Mizoram sawrkarin lawm takin a thawhpuiin a dawngsawng thei reng a ni,” a ti. Chief Minister chuan investor-te tana hmalak awlsam tur zawnga sawrkarin Industry leh Investment Policy a siamthat tawh thu a tarlang bawk a. Sawhthing mai ni lo, thlai thar dang lei leh sawngbawl kawngah pawh Mizoram sawrkar chu Investor-te tan a inhawng hle tih sawiin, he huna tel Investors te chu thla thar, December ni 5 leh 6, 2025-a Aizawl-a neih tur Sawhthing Buyer-Seller Meet-a tel turin a sawm bawk.

He inrawnkhawmna hi Chief Minister, Council of Ministers leh NITI Aayog te nena duanchhuah a ni a, a thil tum ber chu Mizoram-a kuthnathawktute tharchhuah Sawhthing lei leh hralh kawnga harsatna sutkian dan tur sawihona leh Market tha zawk, loneituten an hlawkpui lehzual tur dapchhuah tumna a ni a.  Hetiang inrawnkhawmna neih vawikhatna nia hriat a ni a. He hunah hian Mizoram chhunga Sawhthing sawngbawlna tha zawk neih leh India ramchhung leh khawvel hmun zau zawka Sawhthing thawnchhuah dan tur te an sawi a. Kuthnathawktu pawl (FPOs), Industry leh sumdawng (entrepreneur) te tana kalphung tha zawk leh Sawhthing chin leh hralh kawnga Strategic Action Plan te pawh an sawi a ni.

Inrawnkhawmna hi hun chhawng thuma kalpui a ni a, a chhawng khatna hi a hawnna atan hmangin NITI Aayog Member, Dr. VK. Paul chuan a kaihruai a, a chhawng hnihna ah he huna tel Industry, FPO leh Academia-te nen Mizoram-a Sawhthing tharchhuah hralhna leh sawngbawl zui kawnga hmasawnna tur leh insumdawn tawnna turte an sawiho a, a chhawng thumna ah Mizoram leh central sawrkara mi pawimawh tak tak ten thu an sawi bawk.

NITI Aayog-in rawtna an siam danin Mizoram chu Ginger capital of India tih ni se, Sawhthing te chu Organic a nih zel theih nan hmalak zui zel nise, Technology sang zawk nena processing lam kalpui dan kawng zawn nise, India ramchhung chauh ni lovin rampawna thawnchhuah kawngah pawh hmalak nise an ti a. An rawtnate chu chak taka bawhzui zel turin thutlukna an siam a ni.