PM-KISAN tanpuina semchhuah leh niin inziahluh theih a la ni

Prime Minister Narendra Modi chuan nimin khan PM KISAN hnuaia 21st Installment chu Tamil Nadu-a Coimbatore atangin a semchhuak a, Mizoram atang pawhin mi thahnem takin an dawng a ni.

India rama kuthnathawktute tuamhlawmna Scheme pui ber, PM KISAN hnuaia 21st Installment semchhuahna ah hian Prime Minister chuan Direct Benefit Transfer hmangin India rama kuthnathawktu mi vbc. 9 chuang hnenah tanpuina hi a sem a. He Scheme hi kum 2019 atanga bul tan niin Mizoram-ah pawh Agriculture & Farmers’ Welfare Department hmalakna in kalpui zel a ni a. PM-KISAN hnuaiah hian kuthnathawktu ten tanpuina kum khatah Rs. 6000/- an dawng thin a, tanpuina hi kum khatah installment thum (3) in Rs. 2000/- zela pekchhuah thin a ni.

Nimin-a PM-KISAN 21st Installment pekchhuah ah hian Mizoram-a kuthnathawktu mi 1,17,786 hnenah cheng vbc. 23.5572 semchhuah a ni a, kum 2025-26 FY chhunga installment vawi 2-na a ni. PM-KISAN hnuaiah hian sawrkar hnathawk mek emaw, pensioner awm lohna kuthnathawk chhungkua atangin mi pakhat zel inziahluh theih a ni a. A dawng tlak ngei la in register lo tan registration a tih theih reng a ni. Hrechiang duh chuan Directorate of Agriculture & Farmers’ Werlfare, Tuikual South leh mahni awmna District-a Agriculture Office hrang hrangah te Office hun chhungin a zawhfiah theih reng a ni.