Serchhip-a dawr thenkhat ah eitur expire man belh leh

Serchhip District Consumer Protection Council in Serchhip District chhunga dawr hrang hrang zingah expire tawh bungrua lo zuar ru an awm thu leh hralhchhuak thin an awm tih report an dawn bawhzuina kal zelah nimin khan Serchhip Bazar leh a chhehvel-a dawr thenkhat te chu Health Department hnuaia Food & Drugs Administration te, Police te, Consumer Union leh Legal Metrology ten an enfiah chhunzawm leh a. Nimin khan Dawr 5 an enfiah atangin eitur chi hrang hrang, a siamtu ten a expire hun an bithliah pel tawh si, mipui lei theih tura la zawrhchhuah te chu man an ni leh a, heng te hi hralhchhuah theih loh tura dah niin Dan anga hmalak zui zel tura ruahman a ni.

Tun tuma Dawr enfiahna a kal te chuan sumdawng ten eitur chi hrang hrang an zawrh te chu an en tlangpui tih sawiin, tun tumah hian Dawr lian ho an thlur deuh bik rih tih an sawi a, heng dawr te hian dawr te zawka zawrh tura an hralhchhuah leh thin avangin hetiang hian hmalakna an kalpui hmasak thu leh thla tin Dawr te hi enfiah zui zel tura an ruahman thu an sawi a. Tun tuma eitur expire tawh lo zuar te chu Dan bawhchhiat avanga an man vawi khatna a nih avangin hetiang hi zuar tawh lo tur leh an kawllai te pawh hralhchhuak tawh lo tura an hriattir thu an sawi a ni.