DAY-NULM hnuaiah mi 3080 te eizawnna siam sak

Khawpui retheihna ti ziaawm tura sawrkar laipui hmalakna, DAY-NULM kalpui mekah Mizoram hmun hrang hrangah kawngsir-a thil zuara eizawnna siam sak mi 3080 an awm mek a, heng zinga a tam ber 90% chuang chu hmeichhia an ni.

Directorate of Urban Development & Poverty Alleviation (UD&PA) Department chhinchhiah danin, Deendayal Antyoda- National Urban Livelihood Mission (DAY- NULM) Scheme kalpui mek hnuaiah Mizoram hmun hrang hrangah kawngsir a thil zuara eizawnna siam sak mi mi 3080 an awm a, an zinga a tam zawk chu hmeichhia niin za zela chhutin 91.88 an ni a, za zela 8.18 chu mipa an ni bawk. 

Ministry of Housing and Urban Poverty Alleviation hnuaia Sawrkar Laipui Flagship Programme pawimawh ber pakhat, National Urban Livelihood Mission (NULM) hi kum 2013 September ni 24 atang khan ram pumah kalpui tan a ni a, Mizoram-ah pawh UD&PA Department in he Mission hi kalpuiin, Mission tum bulpui ber chu a bulthuta mirethei te inzawmkhawmna pawl chak leh ngelnghet tak, Self Help Group (SHG) leh SHG Federation din a, hemi kaltlanga khawpui retheihna tihtlem a, mirethei chhungkuate tana eizawnna tur hlawk zawk leh hnathawh tur tha hmuhpui a, an harsatna sukianpui bakah eizawnna ngelnghet an neih theihna tura kawng kawhhmuh a ni.