Education Minister in Champhai District a tlawh

School Education Minister Dr. Vanlalthlana chuan nimin khan Champhai District tlawhin DIET Champhai Hostel Building a hawn bakah Govt. Champhai High School Golden Jubilee lawmna hun a hmanpui nghal bawk.

School Education Minister hian DIET Champhai Hostel Building hi nimin khan hawngin a lawmna inkhawm ah Hostel building thar an neih avangin a lawmpui thu a sawi a, zirlai hmun hla atanga lo kal te'n an hman tangkai ngei a beisei thu leh inngeih tlang zawk leh inpawh tlan zawk nan an hman ngei a beisei thu a sawi a. DIET hmanga zirna an ti danglam chu Mizoram in a hmuh hmaih loh tih sawiin, an fakawm a tih thul eh entawn tlak an nih thu a sawi a. Zirtirtu leh zirlaite zirtirna ti danglamtu leh ti hmasawntu an nih theih nan theihtawp chhuah turin a chah a, an pawimawhna phochhuak turin tan la zel turin a fuih bawk.

DIET Champhai Hostel Building hi May ni 9, 2022 khan hna tan niin March ni 6, 2024 khan sak zawh a ni a, sak nan hian Rs. 2,18,65,593 sen a ni a, nimin-a a hawnna hun hi SCERT Jt. Director Zoramthangi Ralte chuan kaihruaiin District Education Officer K. Lalsiamliani chuan Hostel sak dan report a pe bawk a ni.

School Education Minister Dr. Vanlalthlana hian nimin vek khan Govt. Champhai High School kum 50-na, Golden Jubilee lawmna hun chu khuallian niin a hmanpui bawk a, Govt. Champhai High School chu School lar tak, zirna leh infiamna ah hlawhtlinna pawh lo nei hnem tawh an nih thu sawiin, Golden Jubilee an thleng thei chu ropui a tih thu a sawi a, nakin zela hlawhtlinna chang chhunzawm turin zirlai leh zirtirtute chu an theihtawp chhuah turin a chah a. Mihring chuan thil tum kan nei theuh thu leh Champhai tan leh mahni School tan thil tha duh chuan mahni theuh an pawimawh thu a sawi bawk.

Education Minister chuan he School motto, ‘Labour First, Pleasure Next’ tih chu tha a tih thu sawiin, nakina eizawnna leh chhungkaw chawmna nei turin he Motto hi vuan nghet tlat turin zirlaite a chah a. Zirna hi chakna a nih thu leh Mizoram chuan Human Resources a neih tha hle  tih a sawi bawk a ni.

Niminpiah khan Education Minister Dr. Vanlalthlana hian Govt. Tualte Primary School kum 100 tlin lawmna hun chu a hmanpui bawk a, Tualte Primary School-in kum 100 an thleng thei chu ropui a tih thu sawiin, Zirtirtu ni mek te leh pension tawhte fakawm a tih thu sawiin, zahna chibai a buk a. Zirlaite chu faina leh hriselna te ngai pawimawh tura fuihin, bawlhhlawh an neih leh hmuh apiang bawlhhlawh bawmah paih zel turin a chah a. Tualte vanglai thleng leh thei tura zirna ngai pawimawh turin a chah bakah, Tualte Primary School leh Tualte khua vul zel turin duhsakna a hlan a ni.