District Administration-te chu Mini-Secretariat anga hnathawk (function) turin kalpui tum a ni

Department of Personnel and Administrative Reforms (DP&AR) changtu Minister K. Sapdanga chuan mipuite tana awlsam nan leh rang zawka service pêkchhuah a nih theih nan District Administration-te chu Mini-Secretariat anga hnathawk (function) turin kalpui tum a nih thu a sawi.

Mizoram Civil Service Association (MCSA) Conference vawi 49-na nimin-a Aijal Club McCabe Hall-a neih a hmanpuina ah DP&AR changtu Minister K. Sapdanga chuan State dang kalphung tha zâwk angin, mipuite tana awlsam nan leh rang zawka service pêkchhuah a nih theih nan District Administration-te chu Mini-Secretariat anga hnathawk (function) turin kalpui tum a nih thu sawiin, Sawrkar-in hma a la chho mêk tih a sawi a. “Thil engemaw tih dawn hlek a, thingtláng kilkhâwr zawk atanga Aizawl pan ngai kher lovin, District Headquarters-a tihfel mai theih turin power pawh hi semzai a ngai a, ‘decentralization of power’ tih dawn hian Sawrkar hnathawk thenkhat zingah pawh ui tlat, phal tlat lo, harsatna hlîr ngaihtuah a awm theih a, chung pawh chu ram tana tha tur a nih chuan kan pal luih deuh pawh a ngai ang,” a ti a ni.

Social Media-a ti ti lâr tak ‘Aizawl-Centric Thinking’ tih chu Secretariat-a Officer tam zawkte Aizawl pêl lêm lo an tam vang nia a lan thu pawh sawiin, “A mimal an tha lo tihna ni lovin, Aizawl pawn pela ngaihtuahna neih an harsat em em thin a ni,” a ti a. “Chu’ng Official-ten thil an lo duan tawh, Political Level-a lo siamrem chu a harsa tawh thin hle a. Hei vang hian sawrkar policy tam takin thingtlang/mipui mimir a thlen phak loh phah fo a ni,” a ti a. Civil Service-te chu ram rorelna ruhrel ‘structure/steelframe’ an nih angin Mizoram pum huap ngaihtuahna nei thei tur chuan Junior leh Senior Grade-ah Field Posting an ngah lehzual a pawimawh thu leh, chutiang tur chuan Transfer and Posting pawh uluk takin an kalpui ang tih a sawi a, Role-Based, Competency-Based, Right man at the right post ni thei turin Sawrkar chuan hma a la dawn tih a sawi bawk.

DP&AR Minister K. Sapdanga chuan MCS Officers-te chu mi dang tana nu leh pa chan chang thiam zel tur leh MCS kherna leh sawiselna awmte chu kher lêt ve zel lova, mahni insiamthat tûlna a awmna lai apianga insiamthatna atana hmang thiam turin a chah a. “Mi dangin darkar 5 an thawh chuan MCS Officer chuan darkar 7 thawh tur a ni. Mi dang aia thawh tam te, zaidam te, ngilneih te, tlâwmngaih te, rinawm te, hriat-thiamna neih te, mi dang thawhpui thiam te, mi dang aia hriatna zau zawk neih te hi ‘premier service’ quality chu a ni. Kan rilru sûkthlêk leh mi dangte nen kan inlaichinnaah hian inti lal taka va rah beh a ngai lova, kan thinlung leh mite thinlungah hnathawh leh nungchang hmangin ‘premier service’ tih hi tuh zawk tur a ni,” tiin Mi dangte aiin an nungchang chu miin an thlîr bîk a, mi dangin an tih, an sawisel lem loh ah pawh MCS tih a nih chuan a langsâr hma bik thin tih sawiin, nungchang uluk taka hman a pawimawh thu a sawi bawk.

Hei bakah hian Mizoram Handholding Scheme leh Central Flagship Programme hrang hrangte a taka tihhlawhtlinna chu District-ah a innghat tlat tih pawh Home Department changtu Minister ni bawk K. Sapdanga chuan sawiin, “Chuvangin sawrkar Flagship Scheme kalpui danah te, Law and Order enkawlna chungchang ah te, Revenue Administration tihchangtlun zel chungchangah te theihtawp chhuah zel ang che u,” tiin kalkhawmte chu a chah bawk a ni.

Mizoram Civil Service Association (MCSA) Conference-ah hian chawhnu lam ah Sawrkar-in hma a lâk mêk, Administrative Reforms– ‘Institutionalization of District Administration as an integrated Mini-Secretariat’ leh ‘Ongoing Reforms and Progressive Decentralization of Land Revenue Administration’ chungchang zirhona leh sawihona neih nghal a ni bawk.