AR Biak In hmun Mizoram Synod kut-ah awm dawn

Mizoram sawrkar-a General Administration Department chuan Assam Rifle ram chhuahsan chhunga AR Biak In hmun chu Mizoram Synod kut-a awm chhunzawm tura rel a nih thu an sawi.

Hemi chungchanga GAD thuchhuah chuan AR Biak In hmun hi Central YMA ten thubuai an thehluh zingah a tel anga hriat a nih avangin Assam Rifles ram chhuahsan hman dan tur rel tura The Mizoram (Restriction on Use of Transferred Land) Act, 2002 hnuaia Committee din, Advisory Committee thutkhawm July 24, 2025-a neih chuan Court thu ngaihchan rih phawt nise tia a rel thu leh Mizoram Synod hruaitute pawh hriattir nghal nise a tih angin hriattir nghal an ni tih an tarlang a. Court thu ngaihchan a nih mek lai hian Central YMA chuan Mizoram Synod hnenah an thubuai thehluh zingah AR Biak In hmun chu a tel lo tih an hriattir thu an tarlang a. “Hriattirna a dawn ang hian Mizoram Synod chuan sawrkar ah AR Biak In hmun chu thubuai thehluh zingah a tel ve loh thu hi an hriattir ve nghal,” an ti.

November 18, 2025-a Advisory Committee thutkhawm neih chuan ngun taka ngaihtuahin, ‘tun dinhmunah chuan AR Biak In hmun hi Assam Rifle ten sawrkara an hlan zingah chuan a tel ngei a, mahse CYMA lamin thubuai a thehluh zingah a tel ve loh avangin Mizoram Synod kutah hian awm chhunzawm mai se’ tiin a rel tih GAD thuchhuah chuan an sawi a, Advisory Committee chu party hrang hrang aiawh leh NGO sawm chuang awmna, mipui aiawh zo tura din a nih thu pawh sawiin, “He Committee hian lungrual takin thuthlukna a siam thin. Committee rorelnaa tel member tupawh pawn lama Committee rorelte sawisel a, politics khelh nana hmang tawh lo turin kan inhriattirin kan inngen a ni,” an ti bawk.