PHE Tui pump khawl chhia thlakna rawn thlen beisei

Serchhip-a PHE Department hotute chuan Tuikum lui atanga Tui an pump-na khawl chhia thlakna tur chu Vawiin hian Mizoram rawn thlenpui hman an beisei tih an sawi.
Tunhnaia Serchhip khawpui chhunga PHE Department in tui sem lama harsatna an neih chungchangah LENKAWL zawhna chhangin PHE Serchhip WATSAN Sub-Division a SDO, Vanlalmuanawma chuan Tuikum lui atanga Tui an pump-na a Electric khawl-a Pump Soft Starter, Penel Board tia sawi bawk chu November 9, 2025 zan khan a chhia a, hei hi siamthat mai theih a nih loh avang leh thlak ngai a nih avangin Tui pump chungchang ah harsatna an tawk zui ta tih a sawi a ni. PHE Department hian mipuite hnena tluang taka tui sem turin ni khat-ah darkar 20 atanga 22 vel an pump a ngai tih pawh PHE SDO chuan sawiin, Electric khawl hman theih a nih tak loh avang hian Diesel khawl hmangin ni khat ah darkar 8 chauh tui an pump thei tih a sawi a, hei vang hian dan pangngai anga sem tur Tui an neih rih loh thu leh an pump ang ang te chu semchhuah nghal zel a nih thu a sawi.

He khawl chhia hi thlak ngai a nih avangin a thlakna tur pawh chah nghal a ni tih PHE SDO chuan a sawi a, khawl thar hi Vawiin lam hian Lengpui Airport rawn thlenpui theih beisei a nih thu sawiin, tluang taka Serchhip rawn thlenpui a nih chuan chhun zan zawma hna thawkin tunkar tawp lamah chuan khawl thar hi hman theih a beiseiawm niin a sawi a. Tuna khawl chhia ang hi kum 10 kalta khan a lo chhiat tawh thu leh hemi tum hian khawl thar bunin kum 10 vel an hman hnuah a chhe leh ta niin a sawi bawk.