Lenkawl

Serchhip District-ah nimin khan COVID-19 hri kai mi 25 hmuh belh leh an ni.

Serchhip District Cricket Association in an buatsaih Junior Cricket Tournament chu khua in a bumro avangin nimin ah zawh hman a ni lo.

MFA Cup khelh mekah Serchhip District aiawha khel FC Serchhip Kawnpui te chuan nimin khan an match hmasa berah hnehna an chang.

Serchhip District Superintendent of Police (SP) Stephen Lalrinawma chuan tunhnai khan Serchhip District chhunga Police Station hrang hrangte tlawhin Police ten tha taka hna an thawh theih nan Annual Inspection a nei a. Police Station tin te chu hnu chhui leh duty chungchang bakah Police ten harsatna an tawh hrang hrang te sawipuiin, ram leh mipuite rawng an bawlna kawngah hmasawnna turte a sawipui a ni. Ser-chhip District-ah hian Police Station 3- Serchhip, Thenzawl leh North Vanlaiphai te a awm a ni.

Beti Bachao Beti Padhao (BBBP) Serchhip District hmalakna a Thlalak intihsiakna lawmman semna chu nimin khan Serchhip DC Meeting Hall-ah neih a ni.

New Serchhip Pastor Bial KTP atangin nimin khan New Serchhip North Branch KTP leh Bukpui Branch KTP te chuan Serchhip Blood Bank-a dah turin thisen Unit 8 an pe.

Serchhip-a District Information & Public Relation Officer (DIPRO) K. Saitluanga MIS chu Deputy Director (Sr. Grade of Mizoram Information Service)-ah a kaisang a, Serchhip DIPRO hna chelh zui rih turin dah lailawk a ni.

Nimin khan Serchhip District Urban Development Officer (DUDO) hovin Serchhip Auditorium chungchang sawihona neih a ni a, Serchhip Auditorium pawh a hmunah ah tlawh nghal a ni.

Nimin khan Serchhip Press Club-ah TB, Vaihlo leh natna inkaichhawn theihloh (Non-Communicable Disease) te inkungkaih dan zirhona neih a ni.

Mizoram Governor Hari Babu Kambham-pati chuan ‘Best Panchayat Village for North East Zone’ lawmman dawngtu Serchhip District-a Sialsir khua chu a lawmpui thu nimin khan Twitter kaltlangin a sawi a, Sialsir khaw mipui chu Mizoram mipuiin an lawmpui a, an chhuang hle tih sawiin, “Thingtlang khaw dang te pawhin Sialsir khaw mipuite hlawhtlinna ah hian entawn tur tha tak an nei a ni,” a ti. Tarlan tawh angin niminpiah-a ‘3rd National Water Award 2022’ semna ah Sialsir khua hian North East Zone-ahTuihna humhalh tha lawmman pakhatna hi New Delhi-ah an dawng a ni.

Mumbai Mizo Welfare te buatsaihin nimin khan Chapchar Kut-2022 chu Sananil Banguets Hall-ah hman a ni a, Tourism Minister Robert Romawia Royte chuan a hmanpui a ni. Nimin a Chapchar Kut hmanna ah hian Minister chuan Mumbai Zofate zawng zawng Chapchar Kut chibai bukin, “Mizoram Sawrkarin khawvel hmun hrang hranga Zofate insuihkhawm leh inpawhtawn zel a duh a, Covid hripui karah pawh Sawrkarin State hrang hranga Zofate chu a theih ang angin a ngaihtuah a ni,” a ti. Minister chuan Mumbai Mizo Association ten Covid harsat laia chhanchhuah hna an thawh dan chu ropui a tih thu a sawi bawk.

Zirtawpni kalta atanga Lai Autonomous District Council Budget Session neih chu nimin khan zawhfel niin kum 2022-2023 chunga LADC sawrkar sum hman tura ruahmanna cheng nuai 20983.96 leh Supplementary demand for grant of LADC for 2021-2022 cheng nuai 1805.79 leh Schedule of demand for Grants of LADC for 2022-2023 te chu sawiho a nih hnu in pass a ni.

Mara ram-a Missionary (Lakher Pioneer Mission) te hmunhma leh sulhnu te humhalhna tur project, Preservation of Cultural Heritage chu Saikao khuaa kalpui tum niin Social Welfare Minister Dr. K. Beichhua chuan nimin khan Official te hruaiin Saikao khua hi an tlawh a, he Project atan hian Ministry of Tribal Affairs atangin cheng nuai 560 hmuh a ni. Dr. K. Beichhua chuan Tisa leh Thlarau lama malsawmna min thlentu, Sap Missionary te hmunhma leh an sulhnu humhalhna tur project sawrkar laipuiin an lo pawmsak chu Saikao khua leh Mara ramin malsawmna an dawn liau liau a ni tih a sawi a ni.

Mizoram Lok Sabha MP C. Lalrosanga chuan nimin khan Parliament House office-ah Road Transport and Highways Minister Nitin Gadkari chu hmuin Mizoram-a kawngpui sial leh siamthat chungchangte a sawipui a, hna kal mek te bakah Central Infrastructure Road Fund hmanga Mizo-ram-a hnathawh tur rawtte pawmpui thuai turin a ngen a ni. Lok Sabha MP chuan CIRF hnuaia Sihhmui-Ramrikawn kawng cheng vbc. 99 vel senga thawmthatna tur project pawh pawmpui turin Minister chu a ngen a. Chief Minister Zoramthanga hmalakna anga Durtlang Leitan-Sihphir kawng tihzauh leh siamthatna tur project pawmpuina Ministry of Road Transport and Highways-in nimin-a a pechhuak ta chu lawmawm a tih thu a sawi a. KM 10 vela thui helai kawng siamthatna tur atan hian cheng vbc. 46.57 chu CIRF Fund hnuaiah ruahman a ni.

Mizoram-ah ni khat-a COVID-19 hri kai hmuhchhuah an tlem zel a, niminpiah khan Sample 1267 enfiah niin hri kai mi 157 hmuh an ni a, Sample enfiah atanga za zela 12.4 te chuan hri an kai a ni.

Atal Mission for Rejuvenation and Urban Transformation (AMRUT) 2017-2019 kaltlanga cheng nuai 230.73 senga Aizawl Chanmari West-a siam ‘Chhawnzinga Lui Water Supply Scheme’ chu nimin khan PHE Department leh UD&PA changtu Deputy Chief Minister Tawnluia chuan a hawng.

Chief Minister Zoramthanga chuan nimin khan Tlabung khua tlawhin Cabinet thutlukna angin Tlabung RD Block a pian thu a puang.

Health Minister Dr R. Lalthangliana chuan nimin khan sawrkar laipui-a mi pawimawh hrang hrangte chu kawmin Mizoram thil pawimawh a sawipui a. Mizoram in a mamawhna a san em avangin NHM Second instalment cheng vbc. 40 tal a rang thei ang bera release turin a ngen nawn leh bawk.

Serchhip District chu Mizoram District hrang hrang zingah COVID-19 hri kai enkawllai tamna ber ni mekin District mal-a hri kai enkawllai mi 200 aia tam awmna awmchhun a ni bawk a. Tun dinhmunah hri kai enkawllai za aia tamna District panga (5) ala awm a ni.

Nimin khan Serchhip District-ah COVID-19 hri kai mi 32 hmuhchhuah belh leh an ni.

Serchhip District Cricket Association in an buatsaih Junior Cricket Tournament chu Vawiin hian DC Playground, Khawtetlang-ah khelh a ni dawn a, Vawiin hian zawhfel hman tum a ni ang.

Serchhip District Anti-Tobacco Squad leh Health Department-a Food & Drug Administration te chuan nimin khan Serchhip Bazar leh a chhehvel-a dawr thenkhat te tlawhin Dan in a phalloh Shikhar (Gutkha) zuar an awm leh awm loh an enfiah a, dawr hrang hrang an enfiah zinga dawr 6 atangin Shikhar pocket 388 leh SS-One pocket 430 an man a ni.

Tunhnaia Serchhip Auditorium suasam a nih chungchanga Serchhip Thalai Pawl (STP) ten Serchhip Police Station-a FIR an thehluh bawhzuiin nimin khan Serchhip Police te chuan helai a lut thin nia hriat naupang thenkhat chu thu an zawtfiah a, naupang nu leh pa te pawh koh niin FIR thehluttute nen an sawiho hnuah heng naupang te hi kum tlinglo te an nih avanga thubuai kalpui zel lovin FIR thehluh hi tihtawp a ni.

Serchhip District chhunga Thenzawl khua chuan Chief Minister Zoramthanga hnenah an khuaa Rural Development (RD) Block dah tura ngenna an thehlut.

National Water Award vawi 3-na chu nimin khan New Delhi-ah sem niin Best Panchayat Village (North East Zone) chu Serchhip District-a Sialsir khua hnenah hlan a ni.

School of Nursing, Thingdawl, Kolasib a zirlaite thutiam lakna hun tum hnihna leh General Nursing and Midwifery (GNM) 2nd Batch zirchhuakte thlahna hun chu nimin khan hman niin Tuirial bialtu MLA K. Laldawngliana chuan a hmanpui a. School of Nursing, Thing-dawl hi Mizoram sawrkar hnuaia GNM School pahnihna niin tun dinhmunah Principal 1, Tutor 5, Warden 1, LDC 2, Driver 2, Group-D 4 an awm a, zirlai 61 an awm mek bawk a ni. Nimin-a he hun hman ah hian zirlai zirchhuak mi 17 te thlah an ni a, Lalbiaksangi, Jt. Director Nursing (rtd.) chuan heng mite hi thutiam a lak tir a ni.

Mizoram chuan thlawhna-a inkalpawhna chung-changa Sawrkar Laipui Scheme ‘Regional Connectivity Scheme (RCS) Udaan’ hnuaiah hma a lak that avangin ‘The Most Proactive State under RCS Udaan’ Award a dawng a. He chawimawina hi Union Minister for Civil Aviation Jyotiraditya Scindia chuan Zirtawpni kaltaa Wings India 2022 Award function, Hotel Taj Krishna, Hyderabad-a neih ah hlanin Mizoram Sawrkar aiawhin Lalsangpuia, Deputy Controller, Aviation chuan a dawng a ni. He Award hi Sawrkar Laipui a Ministry of Civil Aviation, Airports Authority of India leh Federation of Indian Chambers of Commerce & Industries (FICCI) te tangkawp pek a ni.

Mizo Zirlai Pawl (MZP) leh Aizawl Municipal Corporation (AMC) tangkawp buatsaih Inter College Debate Competition 2022 chu nimin khan Aizawl-a Chanmari YMA Hall-ah neih a ni a, K. Vanlalneihpuia, Govt. Mizoram Law College chu pakhatna niin Beirapatha Khailo, Govt. Hrangbana College chu pahnihna leh Lalparmawii, Govt. J. Thankima College chu pathumna an ni.

Land Revenue & Settlement Minister Lal-ruatkima chuan huan, lo leh ram kaihhnawih document-te Information Technology (IT) hmanga dahthatna leh chhinchhiahna tur, Computerization of Registration, National Generic Documentation System chu Lunglei District-a hman theih turin nimin khan Convention Centre, Lunglei-ah a hawng a, Computerization of Registration hi Sawrkar Laipui hmalakna niin a Software hi Department of Land Resources, Ministry of Rural Development hmalaknain NIC, Pune design a ni a, ‘One Nation, One Software’ tura duan a ni. Cloud based Server-ah Document registration te chu uluk tak a vawnthat niin Mizoram chu India ramah he software hmang thei hmasa parukna kan ni a, NE states zingah pahnihna a ni bawk.

Mara Autonomous District Council (MA-DC) hnuaia MDC inthlanna neih tura hman tur Electoral Roll chu nimin khan Siaha District Election Officer leh District Bawrhsap Lalsangliana chuan a tlangzarh a, MADC hnuaiah hian MDC Constituency 25 awmin, Polling Station 81 a awm a, Electoral Roll thar-ah hian Vote nei thei mipa 20,366 leh hmeichhia 21,960, an vaiin mi 42,326 an awm a. Voter tamna ber Constituency chu 23/Siaha East-II niin,Voter 2808 an awm a, Voter tlemna ber Constituency chu 15/Amotlah niin voter 1049 an awm thung. Hetianga Electoral Roll thar tarchhuah a nih tak avang hian MADC-a MDC thlanna neih hun tur pawh hi puan thuai a nih rin a ni.

Tourism Minister Robert Romawia Royte chu New Delhi-ah chamin nimin khan sawrkar laipui-a mi pawimawh Minister of State for Steel Faggan Singh Kulaste; DoNER Secretary Lok Ranjan; Union Finance Secretary T.V. Somanathan leh Niti Aayog hotute kawmin thil pawimawh hrang hrang a sawipui a, nimin tlai khan New Delhi chhuahsanin Mumbai pan leh tura ruahman a ni.

Niminpiah khan Mizoram-ah Sample 2078 enfiah leh niin heng atang hian COVID-19 hri kai mi 248 hmuh leh an ni a, Sample enfiah atanga za zela 11.93 ten hri kaiin nimin-ah hri kai enkawl dam 218 awm lehin Mizoram-ah hri kai enkawllai 944 an la awm a ni.

AH&Vety Minister Dr. K. Beichhua chuan, “Kan State a Vawk pul hri leng rem theih loh chhan chu mipui ten thu kan awih tawk thin loh vang a ni,” a ti.

Sialkal Range Development Council (SRDC) hnuaia Council thutkhawm chu nimin khan an Chairman L. Thangmawia MLA hovin neih a ni.

Mizoram Rajya Sabha MP K. Vanlalvena chuan Parliament Session neih mekah Assam, Mizoram leh Manipur tlangmi, Barak lui kam a chengte ei leh bar zawnna tih hmasawnna tur chungchang ngaih pawimawh a tul thu a sawi.

Mizoram sawrkar-a Health Department chuan Civil Hospital, Aizawl-a CT Scan khawl hman theihloh chungchangah mipuite hriat-thiamna a ngen.

Mizoram-a School 817-ah Sanitary Napkin Vending Machine bun a ni dawn.

Mizoram chhimlam a zin MNF President Zoramthanga chuan nimin chhun khan Mizo Hnam Run, Lunglei-ah thu sawiin, Abu Majumdar leh Kamrula te pahnih in an sawrkar ah a hmawr te pawh an khawih phak lo tih a sawi.

Serchhip District-ah COVID-19 hri kai an la pung zel a, nimin khan hri kai mi 98 zet hmuh belh leh an ni.

Human Resources Development (HRD) Board Vice Chairman L. Thangmawia, MLA chuan kar khat awh tur Mathematics Summer Day Camp chu nimin khan Pachhunga University College ah a hawng.

Community COVID Care Centre (4C) atana Serchhip District-a zirna In te puanna chu hlih a ni.

Kar kalta, March 20 atanga 26, 2022 chhung khan Serchhip District-ah The Mizoram (Containment & Prevention of the Spread of Covid 19) Act, 2020 bawhchhia mi 26 man an awm a, heng mite pawisa chawi tlingkhawm chu Rs. 2600/- a ni. Mizoram pumah kar kalta chhung khan he Dan bawhchhia hi mi 107 man an awm a, an pawisa chawi tlingkhawm chu Rs. 10,700/- niin dan bawhchhia te hi District 5-ah man an ni a, Aizawl District-ah man tam berin mi 46 man an ni a, Serchhip District-a 26 man an nih bakah Saitual District-ah 15, Khawzawl District-ah 11 leh Champhai District-ah mi 9 man an ni.

Mizoram-a Kohhran Thalai punkhawmna lian ber, KTP General Conference chu May 5 atang 8, 2022 chhung khian Kolasib-ah neih tum a ni a, COVID-19 laka himna atan ruahmanna siam a ni.

Central Trade Union ten March 28 leh 29 chhunga nawrh an tum avanga POL rawn thlen tlem avanga harsatna a thlen loh nan Mizoram a tuialhthei hralhchhuah theih dan bituk thar a ni a. Hei hi nimin zing atanga hman tan nghal tur kha niin tum khat zelah Two Wheelers tan litre 5, LMV tan litre 10, MMV tan litre 20 leh HMV tan litre 40 zel lak theih a ni anga, Buhfai/Essential Commodities phur Truck te chu an challan milin an kal lam leh haw lam daih pek an ni ang. MS dahkhawl litre 5000 leh HSD litre 7000 hnuailam ah Petrol Pump ten FCS&CA Department hriatpuina leh phalna lo chuan an hralhchhuah khap a ni bawk.

Aizawl District Bawrhsap Dr. Lalhriatzuali Ralte chuan nimin khan Sakawrdai khua a tlawh a, Sakawrdai CHC a tlawh hnuah VC House-ah khawtlang hruaitu leh tlawmngai pawl aiawh te nen inkawmna an nei a, an khawtlang mamawh thil chi hrang hrang an lo thlen a ni. He inkawmna ah hian Sakawrdai khawtlang aiawhte chuan hun rei tak SDO (Civil) chu a Post-ah awm lovin BDO Darlawn nen a hmui thu sawiin, mipui dawr theih tura a awm ngailoh thu an lo thlen a, an khua in African Swine Fever (ASF) hri leng avanga Vawk thi za chuang an neih tawh thu pawh lo thlenin, an khua ah Vety Dispensary dahsak turin an lo dil nghal bawk a ni. 

Legal Metrology Enforcement Staff te chuan tunlaia Tel man to nia sawi chungchang ah nimin khan Aizawl-a Dawr thenkhat chu enfiahin dar 5 atangin 'Best Choice' packets 52 an man a, heng Tel te hi MRP-ah Rs. 154/- a nih laiin Rs. 160/- a zawrh a ni a, heng dawr neitute hian MRP aia to in an la nia an sawi avangin an lakna dawr nia sawi pawh insawifiah tura koh an ni ang.

Social Welfare Minister Dr. K. Beichhua chuan nimin khan Lunglei Pukpui-ah Lunglei Observation Home & Lunglei Special Home leh Serkawn, Lunglei-ah One Stop Centre a hawng a, heng te hi sawrkar laipui Ministry of Women and Child Development kaltlanga ruahman an ni. Lunglei Observation Home & Lunglei Special Home hi cheng nuai 422.72 senga Lushai Engineers, Ramhlun, Aizawl te sak a ni a, naupang 50 (mipa 40 leh hmeichhia 10) lenna tura rua-hman niin One Stop Centre hi Baptist Church of Mizoram (BCM) ram-a sak a ni thung.

Kawrtethawveng Development Committee chuan Kawrtethawveng leh a chhehvel mipui ten RD Block Zawlnuam hnuaia an awm avanga harsatna an tawh thin te a kian theih nan leh Hachhek tlangdung chhimlam a bik taka ngaihven ngai an nihzia te hriaa MNF Sawrkar, Zoramthanga kaihhruai Council of Ministers rorelin Kawr-tethawveng Rural Development Block hawn a remti ta chu lawmawm an tih thu thuchhuah siamin an tarlang a. Kawrtethawveng RD Block hi a rang thei ang bera a function theih nan an theih ve chinah chuan Sawrkar kut tichak tura thawk ve turin an inpeih reng tih an sawi bawk.

Siaha District Bawrhsap Lalsangliana chuan nimin khan a Pisa-ah District Green Champion Certificate chu Govt. Saiha College aiawh, an Principal Prof. Addul Hanna Barbhuiya hnenah a hlan a. District Green Champion hi Department of Higher Education of the Ministry of Education, GoI hnuaia Mahatma Gandhi National Council of Rural Education ten DC office kaltlanga kum 2021-2022 chhunga Swachhta Action Plan hnuaia heng- Sanitation, Hygiene,Waste Management, Water Management, Energy Management leh Greenery Management-a thawk tha te hnena a hlan a ni a, Certificate bakah Rs. 5000/- a keng tel a ni.

Mizoram-ah COVID-19 hri kai enkawl dam pung ve zelin nimin tlai thleng khan hri kai enkawllai pawh mi sang khat aia tlem an ni ve ta.

School Education Minister Lalchhandama Ralte chuan, “Pathian leh kan ram tan titu kan nih avangin mualpho lovin kan la kal zel a ni,” a ti.

Aizawl North-II bialtu MLA Dr. Vanlalthlana chuan, “Corruption leh induhsakna uchuak hi a tak taka kan do a ngai,” a ti.

P&E Minister R. Lalzirliana chuan Mission Foundation Movement (MFM) hmalakna hnuaia Chemical Fertilizer tello a thlai thar tura hmalakna chu fakawm a tih thu a sawi.

School Education Minister Lalchhandama Ralte chuan Academic Session tharah pawl 10 atanga pawl 12-a Science leh Mathematics-ah Mizo tawng-a hriatfiah awlsam turin ruahmanna kalpui a nih thu a sawi.

Information & Public Relations Department din kum 50-na, Golden Jubilee lawmna chu nimin khan I&PR Auditorium, Aizawl-ah neih a ni a, he hun hi Chief Minister Zoramthanga chuan hmanpuiin I&PR Department-a thawktu indaihlohna chu sawrkar sum dinhmun a ziaawm hunah sutkian a nih tur thu a sawi.

Serchhip Field Veng-a sak Serchhip Auditorium chu nimin khan Serchhip Thalai Pawl (STP) te chuan a hmunah tlawhin Auditorium leh a chhunga bungraw hrang hrangte chu mi tu tih hriat lohten nasa taka an suasam avangin, hemi kawnga mawhphurtute zawng chhuak turin nimin vek khan Serchhip Police Station-ah FIR an thehlut nghal.

Mamit Joint Village Council chuan Inrinni khan thutkhawm hmanhmawh neiin March 25, 2022-a Council of Ministers thukhawm in Rural Development Block thar pahnih din a remtih zingah Mamit District atanga Kawrte-thawveng RD Block hawn thar a ni tur chu lawmawm an tih thu an sawi a. Hun rei tak atangin RD Block hi Mamit-ah emaw, Mamit bulhnai ah a awm theih nana ngenna sawrkar hotute hnenah an lo thlen tawh thin thu sawiin, BDO Pisa hi Mamit-ah emaw, Mamit chhehvel ah dah a nih theih nan nasa lehzuala hmalak nise an ti bawk.

Mizoram Police Special Narcotics PS team leh BSF Sector Aizawl tangkawp chuan Inrinni khan Rs. 11,35,600/- hu pawisa lem chu Aizawl Dinthar Veng-ah an man a, heng pawisa te hi Lalmuankimi (48), Mualpui Salem Veng inti hnen atanga man niin Police te chuan an chhui zui mek a ni. Thudawn danin heng pawisa lem an man te hi Rs. 500/- note 1368; Rs. 200/- note 1507 leh Rs. 100/- note 1502, a vaiin Rs. 11,35,600/- hu niin hetiang dan phalloh thil dona kawnga thawhpui turin Mizoram Police te chuan mipuite an sawm bawk a ni.

Mizoram sawrkar-a Information & Public Relations Department kum 50 tlinna, Golden Jubilee lawmna chu Vawiin hian Aizawl-a I&PR Auditorium-ah neih a ni dawn a, Chief Minister Zoramthanga chuan a hmanpui ang. He Prog-ramme hi I&PR Department youtube channel-ah live a en theih tura phochhuah a ni ang.

Presbyterian Serchhip Vengchung Pastor Bial Kohhran Hmeichhe Inkhawmpui chu nimin Pathianni hmang khan Serchhip Chhim Veng Kohhran Biak In-ah neih a ni a, thupui atan ‘Kris-tian Chhungkua’ tih hmangin Inrinni khan Palai ten rorelna hun an hmang a ni. Kumin a Presbyterian Kohhran Hmeichhia Bial Inkhawmpui hi hri leng avangin a hun pangngai ah neih theih a ni hlawm lova, Pathianni hmasa khan Serchhip Bial pawhin Serchhip Kawnpui Kohhran Biak In-ah Bial Kohhran Hmeichhe Inkhawmpui hi an lo nei tawh bawk a ni.   UPC North East India hnuaia hmeichhe pawl,  Ladies Auxiliary Department (LAD) Serchhip Pastor Bial Conference vawi 54-na pawh nimin Pathianni hmang khan New Serchhip Bazar Building-ah neih a ni a, he Conference hi College Veng Kohhran ten thlengin Speaker atan bialtu Pastor, Rev. B. Lalengzauva chu hman a ni.

Serchhip District-ah COVID-19 hri kai enkawllai mi 214 an la awm mek.

Mizoram Pradesh Congress Committee (MPCC) President, Lalsawta chuan duhamna chu natna angin a damdawi a awm ve lo tih sawiin, “Ka ta a ni lo tih chul ngai khawpa sum ngah nih hi ka tum ve lo,” a ti.

Serchhip District Football Association buatsaih Sub-Junior (Under-14) Football Tournament chu Inrinni khan khelh zawh niin Hmar Veng FC chuan Field Veng FC chu si khat faia hnehin an champion.

Serchhip District Anti-Tobacco Squad te chuan Inrinni zing khan Serchhip Bazar-a puipunna hmuna meizuk khapna dan bawhchhia an awm leh awmloh enfiahin Squad Drive an nei a, he hunah hian dan bawhchhia a mei zu mi pakhat manin pawisa chawitir a ni.

Serchhip Sub-Hqrs. YMA Science and Environment Committee hmalakna in Inrinni khan Sakhisih Sanctuary-ah Sava bu chhehna tur (Nest Box) siam hnatlang neih a ni.

MNF Party chuan tunhnaiah Sports Minister Robert Romawia Royte chuan Reserve Bank of India (RBI) Official website atanga Mizoram State sawrkar Leiba neih dan lachhuak in MNF Sawrkar hnuah Covid hripui karah pawh GSDP (Gross State Domestic Product = State sum dehchhuah zawng zawng) atanga leiba percentage chu a tlahniam zel tih a sawi tih tarlangin, he a thusawi hi Congress Party chuan a diklo ti dawt si lovin mipui bum thei zawngin thuchhuah an siam ve leh niin an sawi a. Minister Robert Romawia Royte in sawrkar leibat dan a sawi chu a dik tih an sawi bawk.

All India Regional Rural Bank Employees` Association (AlRRBEA) chuan Vawiin leh naktuk ah hian rampumah an thilphut hrang hrang tih hlawh-tlin phut nan lungawilohna an lantir dawn a, he hun hi Mizoram Rural Bank-a thawktute pawhin an zawm dawn avangin MRB Branch te dawr theih an ni lovang. AlRRBEA thilphut zingah hian Govt. of India-in RRB-a share a neih Sponsor Bank kuta dah a tum duhlohna te, Casual Worker-te Minimum Eage anga hlawh pek phal sak phutna leh Compassionate Scheme a nihna ang taka hman leh Pension Scheme hlui anga hnathawktu tharte Pension pek pawh a tel a ni.

Tunkar Ningani thleng awh tur Lai Autonomous District Council (LADC) Budget Session chu Zirtawpni khan Lawngtlai-a LADC Session Hall-ah neih tan a ni a, thutkhawm tan ni hian MDC hlui boral te sunna hun hman niin zawhna leh chhanna hun hman nghal a ni a, Chief Executive Member V. Zirsanga chuan kum 2022-2023 atana sawrkar sum hman tur ruahman cheng nuai 20983.96 leh Supplementary Demand for Grant of LADC for 2021-2022 cheng nuai 1805.79 leh Schedule of demand for Grants of LADC for 2022-2023 te chu House-a sawiho turin a pharh a ni.

Siaha District Bawrhsap Lalsangliana chuan Siaha District khaw hrang hrang tlawhchhuah hna thawk zelin kar kalta khan Kahrie tlangdung chhehvel khua- Siatlai, Zyhno, Chheihlu, Mawhrei leh Chapi khua te a tlawh a, DC a nih anga District mipuite tha taka rawng bawl sak a tum thu sawiin, “Siaha District a ka rawn awm hian thu mai mai tura rawn awm ka ni lova, a taka hna thawk tura lo kal ka ni tih hi ka hrechiang em em a ni,” a ti. Siaha DC hian heng khaw hrang hranga khawtlang hruaitute leh tlawmngai pawl hruaitute kawmin an harsatna te a sawipui a ni.

Myanmar ramchhung buaina in ziaawm lam ala pan hlei thei lova, Inrinni zing dar 4:00 pelh hnu hret khan Myanmar Sipai leh Chin National Defence Force (CNDF) te chu Zokhawtharbul, Khawmawi, Tiau lei bulah an inkap a. Myanmar sipaite hian an in rinloh hlanin CNDF te hi an thawng thut a, CNDF mi 3 te manin hemi hnu lawk hian an kaphlum zui nia hriat a ni a, mi pakhat chu hliamin Champhai District Hospital-a enkawl tura lak a ni. Tun dinhmunah Khawmawi (Tio) khua ah civil mi an awm mumal tawh lova, he khua leh a bul vela awm te chu Mizoram lamah rawn raltlanin raltlan mi 7000 vel zet chu Zokhaw-thar-ah hian an lut tawh nia thudawn a ni bawk.

Mizoram-ah ni tin-a COVID-19 hri kai hmuhchhuah tlem ve hret hret zelin enkawl dam pawh an tam ve zel a, nimin tlai thleng khan hri kai enkawllai mi 1156 an la awm a ni.

Labour, Employment, Skill Development & Entrepreneurship (LESDE) Department in ni 2 awh ‘Kawtchhuah-2022’ an buatsaih kharna hun Inrinni-a Govt. ITI Campus-a an buatsaih chu LESDE Minister Lalchhandama Ralte chuan a hmanpui.

Lunglei Serkawn-a Mizoram Youth Commission Incubation Centre sakna tur lungphum chu Inrinni khan Lunglei North bialtu MLA leh MYC Chairman Dr. Vanlaltanpuia chuan a phum.

Bairabi-Sairang Rel kawng sial mek ‘New BG Line from Bairabi to Sairang’ chhunga Sairang leh Khamrang inkara hna thawh mek te chu Inrinni khan Chief Secretary Dr. Renu Sharma chuan a hmunah kalin an hnathawh te a enfiah.

Mizoram-a Eng (power) hman man bithliahtu Joint Electricity Regulatory Commission for Manipur & Mizoram chuan sawrkar kumthar April ni 1,2022 atanga hman tan turin Eng chhit man chu tuna hman lai mek atanga chhutin 6.78% in a tipung a. Eng chhit man tihpun anih avanga sawrkar sum hmuhbelh tur chu cheng vbc. 24.50 a ni.

MJA Golden Jubilee lawmna leh Annual Conference vawi 48-na chu tunkar Nilaini leh Ningani khan Aizawl-ah neih a ni a, he hunah hian MJA Serchhip District Member mi 15 zinga mi 14 te telin nizan hmasa khan Serchhip an rawn thleng leh a. Hei vang hian tunkar ah LENKAWL a rawn chhuak mumal lo a, chhiartute hriat-thiamna kan ngen e.

Integrated Child Protection Scheme (ICPS) hnuaia Serchhip District Jail Inspection Team te chuan tunkar Ningani khan Serchhip District Jail chu tlawhin nu leh pa an tan avanga Jail-a naupang awm leh awm loh leh an dinhmun te an enfiah a, tun tumah hian kum 18 hnuailam Jail chhunga tang an awm lo a ni. He huna Jail tlawhtute hi Jail Superintendent leh a thawhpui ten lo dawngsawngin, Jail inrelbawlna pawh a that thu leh Jail chhung leh a vel pawh fai taka vawn a nih thu te an sawi bawk a ni.

Serchhip District-a COVID-19 hri kai hmuh tawh zawng zawng chu mi 13,061 an tling tawh a, hri kai hmuh atanga zela 98.13 te chu enkawl dam an ni tawh thung.

SDFA buatsaih Under-14 Football Tournament khelh mek chu Vawiin hian Final khelh a ni dawn a, Field Veng FC leh Hmar Veng FC ten Final hi an khel dawn a ni.

Serchhip District chhungah rampawn atanga Vawk lakluh khapna thupek tihchhuah thar leh a ni.

Myanmar ram buaina avanga Mizoram-a raltlan rawn lut Serchhip District chhunga awm mek te tan tunlai hian Capacity Building Programe buatsaih niin raltlan te tan hian Dan leh hrai an hriat tur pawimawh te, Foreginer’s Act, 1946 leh Integrated Child Protection Scheme (ICPS) tih thupuite hmangin an tana hriattur pawimawh hrang hrangte hrilh an ni.

High Level Drug Disposal Committee, Mizoram chuan Champhai Police in ruihhlo an man Rs.1,01,92,76,000/- hu chu nimin khan dan angin an halral a, heng te hi kum 2019-2021 chhunga man niin Pseudoephedrine kg. 238.90 leh Methamphetamine kg. 30.90 te a ni.

India zalenna kum 75-na lo thleng tur lawmna Azadi ka Amrit Mahotsav kal zelah Sawrkar Laipui chuan Hmarchhak State te Programme chi hrang hrang buatsaih tura hriattirin Mizoram chu Eco-Tourism leh Climate Change lam hawi programme buatsaih tura tih a ni a. Hemi chung-chang ngaihtuah hian nimin khan Planning and Programme Implementation Secretary Lalmalsawma Pachuau hovin Mizoram-a North East Fest hman dan chu sawrkar mi pawimawh ten sawiho in May 2 atanga May 4, 2022 chhung khian Reiek-ah hman nise tiin hun hman dan tur kimchang chu la sawiho leh tura tih a ni.

Nimin khan Chief Secretary Renu Sharma hovin CS Conference Hall-ah State Level Coordination Committee chu thukhawmin PM POSHAN Annual Work Plan & Budget 2022-23 chu thlirhova pawm a ni. He Meeting-ah hian PM POSHAN hnuai Primary School 1408 leh Middle School 1087, a vaiin School 2495 te hnenah chawchhun pek a nih thu leh naupang 1,43,471 ten an chhawr tih report a ni a. School hrang hrangah Kitchen Garden 1066 a awm a, Covid-19 hripui len laiin school kal theih a ni lo naa, zirtirtuten chawchhun chu naupangte In ah kalchilhin an sem reng a, hripui len lai hian chaw-chhun sem zel a ni tih tarlan a ni bawk. PM POSHAN hi Mid Day meal tih thin kha a ni a, tun hnaiah a hming hi thlak a ni. Nimin-a meeting-ah hian kum 2022-23 atana Budget ruahman Primary School tan cheng nuai 1522.02, Middle School tan cheng nuai 1052.67, a vaiin cheng nuai 2574.69 te chu pawm a ni bawk.

NABARD (RIDF-XXV) sum cheng nuai 315.46 senga nizung chakna hmanga Tualte khaw tana tuilakna siam, Tualte Water Supply Scheme chu nimin khan PHE Department changtu Deputy Chief Minister Tawnluia chuan a hawng.

Mizoram-ah COVID-19 hri kai hmuhchhuah thar an tlem ve zel a, nimin thleng khan hri kai mi 2,23,516 hmuhchhuah an ni tawh.

Mizoram Pradesh Congress Committee (MPCC) chuan MNF kum li awrh an sawrkar chhung hian leiba a pung nasa em em nia sawiin, kawngpui siam chungchangah kum 2018-a MNF sawrkar thar kha Congress sawrkar khan cheng nuai 8900 lai a hnutchhiah tih an sawi.

Ni zung chakna hmanga thlai leh thei tharchhuah metric ton 10 thlenga vawnthat theihna tura ruahman Solar Cold Storage, Mizoram a hmasa ber tur chu niminpiah khan Deputy Chief Minister Tawnluia'n KVK Khawzawl-ah hman theih turin a hawng.

Magic Bus Foundation chuan nimin khan School Headmaster, Zirtirtute leh Community Coordinator hnathawk thate lawmpuina hun an hmang a, he hun hi School Education Director James Lalrinchhana chuan a hmanpui a ni.

School Education Minister Lalchhandama Ralte hova Human Resources Development Board (HRD) thukhawm chuan Sawrkar Sikul te'n Uniform inang neih a nih theih nan sawrkar thuneitu sang zawkah thlen nise an ti.

Chief Minister Zoramthanga hovin nimin khan CM Conference Hall-ah Council of Ministers thutkhawm neih a ni a, Department hrang hrang atanga ngaihtuah tur lut te ngaihtuahin Excise & Narcotics Department (END) atanga Mizoram Liquor (Prohibition) Draft Rules, 2022 rawtna thehluh chu pawm a ni.

Ministry of Youth Affairs and Sports, Govt. of India hnuaia Nehru Yuva Kendra Sangathan, Serchhip District bultumin Vawiin khan Thenzawl Lothazawl Football Ground-ah Block Level Sports Meet (Football Tournament) chu neih tan a ni a, Thenzawl Forest Division-a DFO Lalbiakchama Chawngthu chuan a hawng a ni.

Nimin March 22, 2022 khan ‘Groundwater-Making the invisible Visible’ tih hmangin ‘World Water Day hman a ni a, Serchhip-ah chuan zingkar-ah he ni puala Rally neiin Serchhip Bazar-ah hun hman a ni.

Nimin khan Serchhip District-ah COVID-19 hri kai mi 69 hmuh belh leh an ni a, Thenzawl ah hri kai 24 hmuh niin Serchhip-ah 9, North Vanlaiphai-ah 7, Mualcheng-ah 6, East Lungdar leh Lungpho-ah 4 ve ve, Keitum, Hualtu leh Khawlailung-ah mi 3 theuh, Chhingchhip-ah 2 leh Hmunzawl, Khawbel, Chekawn leh Sialhau-ah mi pakhat theuh hmuh an ni bawk.

Mizoram Journalist Association (MJA) kum 50 tlin lawmna leh MJA General Conference chu naktuk leh naktip ah hian Aizawl-ah neih a ni dawn a, he hunah hian MJA (SD) member te an kal dawn avangin MJA Member te enkawl Chanchinbu leh Cable TV News te March ni 23-25, 2022 chhung hian chawlh turin MJA (SD) in a rel a, hemi ang hian LENKAWL pawh rawn tihchhuah a ni dawn lova, chhiartute hriat-thiamna kan ngen e.

ZPM Thalaite chuan nimin khan Aizawl Press Club-ah thuthar thehdarhtute kawmin MNF Unit leh Group-in sawrkar hna an la chu MNF sawrkarna hnuaiah dan rorelna in awmzia a neih lohzia lantirtu a ni tih an sawi a, SEDP hnuaia Zirtirtu post 2 leh LDC post 1 lakna turah East Lungdar Group MNF Secretary chuan WhatsApp advertisement chhuahin, he hna thawktu tur hi tun thla ni 18 zan khan East Lungdar Group MNF leh Unit hruaitute chuan an thlang tih an sawi bawk.

Nimin khan Deputy Chief Minister Tawnluia hovin AMRUT 2.0 kalpui dan tur sawihona chu Aizawl-a SAD Conference Hall-ah neih a ni.

UPC (NEI) hnuaia Pentecostal Youth Department (PYD) Serchhip Bial te chuan nimin a PYD dinchampha vawi 53-na pualin Serchhip District Hospital Blood Bank-ah thisen Unit 36 an pe a, thisen petute hi mipa 24 leh hmeichhia 12 an ni. PYD hi kum 1969 khan din a ni a, nimin an an dinchampha pual hian nizan khan PYD Branch hrang hrangte chuan an remchan dan angin hun an hmang bawk a ni. Serchhip Bial-ah hian UPC (NEI) hian Tualchhung Kohhran 7 neiin heng ah hian PYD Branch 6 a ding a, tunah hian member mi 480 vel an awm mek a ni.

Serchhip District Football Association buat-saih Under-14 Football Tournament chu nimin khan Serchhip Sports Complex-ah khelh tan a ni a, he Tournament-a hi Excise & Narcotics Department-a Asst. Commissioner, B. Ngur-chhuana chuan hawngin he huna rawlthar infiammi kalkhawm te chu ruihhlo leh Zu laka fihlim turin a chah a, vawi khat tih chhin in ngawlveina a thlen theih thu sawiin, tichhin lo turin kalkhawm te chu a chah bawk a ni. Under-14 Football Tournament-ah hian Team 11 an tel a, tun thla ni 26-ah Final khelin zawhfel a ni ang.

COVID-19 hri leng avanga Serchhip P&E Veng, Serchhip Bukpui, Khawlailung, Bungtlang a hmun thenkhat leh North Vanlaiphai te Restricted Area-a puanna chu Chief Medical Officer in rawtna a siam angin nimin tlai dar 5:00 khan hlih niin tunah hian Serchhip District-ah Restricted Area hi a awm tawhlo nia thudawn a ni.

Nizan hmasa khan Thenzawl-ah Ganja kg. 14 zet man niin a neitu nia hriat te hi thubuai siam sak an nih hnuah nimin khan Serchhip District Court-ah hruai an ni. Thudawn danin nizan hmasa khan Thenzawl Joint YMA hnuaia ‘Ruih-hlo Do Squad’ te chuan Thenzawl Vengthlang ah Ganja kg. 14 zet hi manin a neitu nia hriat Lalhmangaihi (43), Thenzawl Vengthlang pawh man nghal a ni a, heng Ganja leh a neitu nia hriat te hi Serchhip-a Excise & Narcotics Department kutah hlan an ni a, nimin vek khan Serchhip District Court-ah hruai nghal an ni.

COVID-19 Vaccine pek hna kalpui mek ah nimin khan Serchhip District-a kum 12 leh 14 inkar te hnenah Vaccine pek tan an ni.

Serchhip khawchhunga pawl 10 zirlaite tana buatsaih kar khat chhung awh tur ‘Mathematics Summer Camp’ chu nimin khan Govt. Serchhip College-ah neih tan a ni.

Indian Super League (ISL) Final chu Pathianni zan khan khelh niin Hyderabad FC chuan Kerala Blasters hnehin an champion a, Hyderabad FC-ah hian Serchhip tlangval Mark Zothanpuia chu a khel a ni.

Kan ramin a mamawh ber chu Sawrkar tha a ni - Lalsawta Mizoram Pradesh Congress Committee (MPCC) President Lalsawta chuan kan ramin a mamawh ber chu ‘Sawrkar Tha’ a ni tih sawiin, “Pathian leh mipui zara sawrkarna kan siam a nih a, kum 5 chhung mahni inhrek ngama sawrkar kan kalpui ngat chuan kan ram leh mipui pawh hi kan danglam ngei ngei ang tih hi kan ring tlat,” a ti.

Pathianni khan Mizoram-ah COVID-19 hri kai mi 123 hmuh leh an ni a, hei hi Sample enfiah 662 atanga chhutin za zela 18.58 ten hri kai ang a ni a, hri kai zinga zaa 99 enkawl dam an ni tawh.

ZPM Party chuan nimin khan Aizawl-a an Party Office-ah Chhung Inkhawm neiin he huna thu sawitu AMC Opposition Leader Mal-sawmzuala chuan ni 2 awh AMC Board of Councillors Meeting an neih zawh takah zawhna lut 12 zinga 10 chu ZPM atanga lut a nih thu leh Motion lut zawng zawng 8 pawh ZPM atanga thlantlin Councillor te putluh vek a ni tih a sawi a. Kumin a AMC Budget cheng nuai 6500.69 a nih thu leh BOC Meeting chu Live Telecast ni ve tawh se an duh thu a sawi bawk.

MNF Party chuan nimin khan Aizawl-a Mizo Hnam Run-ah Chhung Inkhawm an nei a, he hunah hian MNF Adviser leh Minister Robert Romawia Royte chuan thu sawiin, “MNF sawrkar hnuaiah Leiba a pung lo tih hi Mizoram mipuiin hria se ka duh,” tiin, “Kan leiba neih hi Gross State Domestic Product % atanga chhutin Congress sawrkar lai aiin MNF sawrkarah a tlahniam hle tawh zawk a ni,” a ti a. SEDP-ah chhungkaw 60,000 tuam a nih dawn thu leh Constituency tinah chhungkaw 1,500 thlan hmasak an ni dawn tih a sawi bawk.

Krishi Vigyan Kendra (KVK) Lengpui in an buatsaih Sangha tui tirna tur, Chinese Carp Hatchery chu nimin khan Lengpui-ah Agriculture Minister C. Lalrinsanga chuan a hawng a, helai hmunah hian Indian Major Carp leh Exotic Major Carb te keu tir tum a ni dawn a, vawikhat ah nuai 20 vel a keutir theih a ni ang.

Nimin khan Lawngtlai-ah Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman leh District Bawrhsap Marilyn Rualzakhumthangi hovin DC Conference Hall-ah an thukhawm a, he hunah hian pawisa thîr hman a harsat chung-châng leh dâwrkaite'n an dawn duhloh thin thu te tarlan niin, Pawisa thîr chu sawrkarin hman theih tûra a siamchhuah a nih avângin dawn leh hman a hlauhawm loh thu leh dawng duhlo chu dân anga hrem theih an nih zâwk thu târlan a ni a, Pawisa hi lehkha aia thîr-a siam a hautak loh zâwk avângin thîr herchhuah a tam deuh deuh thu leh pawisa thîr chu pawisa lêng vêl atâna ruahman a nih thu te tarlan a ni bawk.

State Bank of India chuan Corporate Social Responsibility atanga ICU khum 50 an lei chu nimin khan Mizoram sawrkar hnenah an hlan a, heng khum hlanna puala inkhawm Chief Secretary Dr. Renu Sharma Pisa-a neih ah Chief Secretary chuan SBI chungah lawmthu sawiin, Sawrkar in hripui dona kawnga hma a laknaah Public Sector leh Private Sector te nen tang tlanga kan theihna ang anga hripui kan do tlang hi a lawmawm takzet a, mihring mihrinnaa in hma-ngaihna kan lantir hi a ropuiin nun ho a nawm phah hle a ni, a ti. Heng ICU khum te hi United Company siam niin pakhat hi Rs. 72,379/- man a ni. SBI General Manager Lunkim Thangboi chuan COVID-19 hri leng dona atana hma an lo lak tawhna te a sawi bawk.

Kum kalta (2021) khan Mizoram-ah Cyber Crime kaihhnawih thubuai 470 vel ziahluh awmin chung zinga 70% vel chu pawisa lam kaihhnawih a ni.

Nimin tlai dar 4:30 vel khan Aizawl Bawng-kawn Veng-a Non-Mizo Christian Center bula Assam Type pakhat chu kangin Lalnuntluangi (35) chu a kanghlum. Thudawn danin he In hi Nazami In niin a chhawng chung zawk chu In neitu hian luahin a hnuai hi a fa, Lalnuntluangi te chhungkua, member 3 in an luah a, In kan lai hian insaseng mah se a hnuah Inchhung lam ngaihvena kal lehin hetah hian a kanghlum ta nia thudawn a ni.

Zirtawpni kalta zing-a Durtlang Mual Veng-a Electric Detonator puak chu Telangana State siam, Aizawl-a Agent-te hnen atanga rukchhuah niin Police-te’n an ring. Electric Detonator phurhna Motor hi Aizawl leh Manipur-a Moreh khaw inkara tlan thin a nih bakah Aizawl leh Tripura inkarah a tlan bawk thin niin Police te’n an sawi a, Electric detonator hi Aizawl-a Agent-te hnen atanga ruk chhuah a ni em tih pawh chhui zui mek a ni. Hetiang Electric Detonator, Mizovin bomb kép an tih, Pentaerythritol Tetranitrate (PETN) an tih mai hi a tuamna lehkha atanga a lan dan chuan Telangana State a siam niin a lan thu Police-te chuan an sawi a ni.

Tunhnaia Comptroller and Auditor General of India (CAG) Audit Report chuan Mizoram States Sports Council (MSSC)-in cheng nuai 80 chuang senga infiamna hmun 3 a siamah hna thawk zo lo chungin pawisa a pechhuak tih a sawi.

Serchhip District-ah COVID-19 hri kai enkawllai mi 231 an la awm mek.

Salvation Army Thalai pawl, Salvation Army Youth (SAY) Serchhip Corps te chuan Inrinni khan Serchhip Blood Bank-a dah turin thisen Unit 11 an pe a, thisen petute hi mipa 9 leh hmeichhia 2 niin heng mi tlawmngai te hi Blood Bank ah kalin thisen hi an pe a ni.

Serchhip Thalai Pawl (STP) chuan Inrinni khan kum 2022-2023 chhunga an hruaitu tur thlanna an nei a, President-ah T. Biakchamliana (AOC Veng); Vice President-ah R. Lalfamkima (Chhiahtlang); Secretary-ah Hmingthansiama (Bazar Veng); Asst. Secretary-ah C. Lalrochhuanga (New Serchhip), Treasurer-ah Lal-lawmawmi (New Serchhip) leh Fin, Secretary-ah Beulen VL. Awmpuii (New Serchhip) te thlan an ni.

Serchhip District Football Association (SDFA) buatsaih kum 14 hnuailam te tana Football a inelna chu Vawiin hian Serchhip Sports Complex-ah khelh tan a ni dawn.