Hri kai enkawl dam zaa 99 aiin an tam tawh

Pathianni khan Mizoram-ah COVID-19 hri kai mi 123 hmuh leh an ni a, hei hi Sample enfiah 662 atanga chhutin za zela 18.58 ten hri kai ang a ni a, hri kai zinga zaa 99 enkawl dam an ni tawh.

Pathianni khan Mizoram-a RT-PCR Laboratory, Fluorescent Immunoassay Test leh TrueNat Laboratory-ah Sample enfiah a awm lova, Sample enfiah te hi Rapid Antigen Test hmanga en vek niin District 5-ah Sample enfiah a ni a, heng atang hian hri kai mi 123 te hi hmuh niin an zinga 72 te chu Aizawl District-a hri kai hmuh te an ni a, Mamit District-ah 21, Saitual District-ah 18, Lunglei District-ah 8 leh Champhai District-ah mi 4 te an ni.

Nimin khan Mizoram-ah hri kai enkawl dam mi 408 an awm belh ve leh thung a, heti hian nimin tlai thleng khan Mizoram-a hri kai hmuh tawh chu 2,22,706 niin an zinga 2,20,667 te chu enkawl dam an ni tawh a, hri kai hmuhchhuah atanga za zela 99.08 te enkawl dam ni tawhin enkawllai mi 1362 an la awm a, hri kai zingah mi 677 an boral tawh bawk a ni.