Tlabung RD Block a pian thu Chief Minister in a puang

Chief Minister Zoramthanga chuan nimin khan Tlabung khua tlawhin Cabinet thutlukna angin Tlabung RD Block a pian thu a puang.

Tlabung RD Block puanna inkhawm hi nimin khan Tlabung-a Licheng Mual-ah buatsaih niin he hunah hian Chief Minister chuan Tlabung RD Block chu a takin, a nih tur ang taka a kal theih nan bawhzui ngai turte bawhzui thuai a, RD Department leh a kaihhnawih Department dangte nen sawiho a, chak taka hmalak zui zel a nih tur thu a sawi a. Kumin chhung ngeia RD Office function tir tum a nih thu a sawi a ni. Chief Minister chuan Tlabung hi lawngchawlhna hmun pawimawh, ramri dep khaw pawimawh tak a nih avangin leh la thang chauh tur a nih avangin Department Office hrang hrang pawh a la awm belh zel tur thu a sawi a. Tuna RD Block a puan a ni hi malsawmna nasa zawk an hmuh zel theihna tura bultanna nise tiin duhsakna a hlan a ni.

Chief Minister chuan Special Assistance to States for Capital Expenditure hnuaiah sawrkar laipui atangin tanpuina sanction State in a hmuh atangin cheng nuai 200 chu Tlabung bial tan pek a nih thu sawiin, a dang pawh pek belh tum a nih thu a sawi bawk.

Nimin a he hun hman hi RD Minister Lalruatkima pawhin a telpui a, Tlabung chu State tan hmun pawimawh tak a nih thu te, chen zelna atan humhalh a, mipui hmasawnna tur atan RD Block a dah sawrkarin pawimawh a tih thu leh chumi atana hmalak a nih chhoh dan a sawi a. Bawhzui ngai dangte theihtawpa bawhzui zel a nih tur thu a sawi bawk. RD Minister ho hian Tlabung RD Block Office awm theihna hmun tur chu nimin khan Tlabung khawtlang hruaitute chuan an en a, tunhma lama SSB Camp hlui, SSB ten an chhuahsan tawh hmun te, Circuit House bul te leh SDO (Civil) office bul ram awm dan leh a rem dan te an enfiah a ni.

Tlabung RD Block puanna hun hi Lunglei HPC Vice Chairman Lawmawma Tochhawng chuan kaihruaiin bialtu MLA Nihar Kanti Chakma pawhin bialtu MLA a nih angin a lawm thu a sawi a. Lunglei DC Kulothungan A pawhin he hunah hian thu a sawi bawk a ni.

Tlabung-a zin Chief Minister hian nimin zing khan Kawrpuichhuah tlawhin mipui nen inkawmna hun tawi an hmang bawk a. Kawrpuichhuah chu Mizoram tan hmun pawimawh tak a nih thu te, bungraw thlenna hmunpui, sumdawnna hmun pawimawh a nih zel theih nan khawthlang lam ami te nen inkalpawhna tur Lei dawh te leh hmasawnna ruhrel pawimawh din tura ruahmanna siam a nih thu a sawi a. Hripui leng avanga hun engemawchen chhung chu duh anga hmasawnna hna thawh theih loh phah mah se tunah hri pawhin ziaawm lam a pan avangin chak zawka hna thawh theih ngei a beisei thu a sawi bawk a ni.