Naupangte tih tlangnel hmasak a tul - Edn. Minister

School Education Minister Lalchhandama Ralte chuan naupang ten School an luh tantirh ah Zirlaibu luhchilh nghal ngawt lova chawlhkar hnih vel chu naupangte tih tlangnelna tur programme School-in an siam a tul thu a sawi.

Nimin a Samagra Shiksha Annual Work Plan & Budget 2022-23 thlirhona hun School Education Complex Conference Hall, Aizawl-a neih ah he thu hi sawiin Education Minister chuan kum hnih chhung zet sikul a kal theih loh avangin nau-pangte chu sikul an luh tantirhah zirlaibu luhchilh nghal ngawt lova chawlhkar hnih vel chu naupang te tih tlangnelna tur programme School-in an siam a tul thu hi a sawi a. Covid-19 laka inven dan chungchang te pawh naupangin an hriat theih nan School-ah inzirtir zui a tul thu a sawi bawk.

Education Minister chuan kan ram zirna ah Samagra Shiksha hian chanvo pawimawh tak a chang tih pawh sawiin, thawktute zawng zawng chu an kova tla leh mawhphurhna te tha taka hlenchhuak turin a sawm a. Data rintlak neih a tul thu te, Data lakkhawmah Field-a thawktute infuih that a tul thu te a sawi bawk.

Nimin-a Annual Work Plan & Budget thlirhona ah hian Science leh Mathematics zirlaibute chu Class IX-XII thlengin naupangin Mizo tawng-a an hriatthiam theih nan tawng pahnih English leh Mizo tawng hmanga ziah tum anih dan te, Class IX zirlaibu atanga zir tan tum anih thu te, MBSE-in hma an lak dan te sawi a ni a, Primary atanga zirna kal chho zelah Higher Secondary School mamawhna a len thu te sawi a ni.

Samagra Shiksha hian Pre-School atanga Higher Secondary School thleng bakah SCERT hnuaia DIET te a huam a, nimin-a he sawihona ah hian HRD Board Vice Chairman L. Thang-mawia MLA pawh a tel a ni.