Vawk pul hri rem theihloh chhan mipui ten thu kan awih tawk thin loh vang - AH&Vety Minister

AH&Vety Minister Dr. K. Beichhua chuan, “Kan State a Vawk pul hri leng rem theih loh chhan chu mipui ten thu kan awih tawk thin loh vang a ni,” a ti.

Cheng nuai 119.22 senga sak Siaha District Veterinary Hospital hawnna hun nimin-a neih ah he thu hi sawiin AH&Vety Minister Dr. K. Beichhua chuan State pawn lam atanga Cawk lakluh te sawrkar in a khap tih sawiin, mahse a ruk te a lo lalut duh tawk kan awm leh thin thu a sawi a. Tunah pawh hian African Swine Fever hi a reh hlei theih lo tih a sawi a. “A ziaawm tawh dawn emaw kan tih laiin Sakawrdai leh Champhai lamah hmuhchhuah a ni leh a, he hri hi Vety Department chauh chuan do hneh chi a ni lo, mipui kan tanrual a ngai a ni,” a ti bawk.

Siaha District Veterinary Hospital hi NABARD-RIDF XXIV atanga sak niin cheng nuai 119.22 ruahman a ni a, Daniela, Siahatlah in a sak hna thawkin October, 2019-ah sak tan niin, March, 2022-ah sak zawh a ni a. Zopa chhiara chhawng 2 niin Ground Floor-ah Operation Theater, Recovery Room, Examination Room, Veterinary Officer Room, Registration Room leh Waiting Room te a awm a, Toilet 3 a awm bawk. 1st Floor-ah hian Room 5 awmin, Staff Room, Computer Room, Store Room te a awm a, Toilet 3 a awm bawk.